លោក Macron ធានាថា អ៊ុយក្រែន នឹងមិនធ្លាក់ចូលទៅក្នុងកណ្ដាប់ដៃ រុស្ស៊ី ឡើយ

នៅក្នុងកិច្ចប្រជុំជាមួយអធិការបតីអាល្លឺម៉ង់ Olaf Scholz និងប្រធានាធិបតីប៉ូឡូញ Andrzej Duda កាលពីថ្ងៃចន្ទ, ប្រធានាធិបតីបារាំងលោក Emmanuel Macron បានប្ដេជ្ញាថា អ៊ុយក្រែននឹងមិនអាចធ្លាក់ចូលទៅក្នុងការកណ្ដាប់ដៃរបស់រុស្ស៊ីឡើយ ។

លោក​ Macron បានលើកឡើង​ក្នុង​សន្និសីទ​សារព័ត៌មាន​នៅ​ទីក្រុង​ប៉ារីស​ថា “សង្គ្រាម​លុកលុយ​ដែល​ដឹកនាំ​ដោយ​រុស្ស៊ី ​គឺបាន​បង្ហាញពីបរាជ័យ​ផ្នែក​យុទ្ធសាស្ត្រ និង​ភូមិសាស្ត្រ​នយោបាយ​សម្រាប់​ប្រទេស​នេះ​រួច​ទៅ​ហើយ” ។

ទន្ទឹមនោះ ប្រធានាធិបតីបារាំងរូបនេះក៏បានផ្ដល់ការធានាដែរថា រុស្ស៊ីនឹងមិនទទួលបានជ័យជម្នះក្នុងសង្គ្រាមជាមួយអ៊ុយក្រែនឡើយ ហើយស្ថានភាព​នៅ​អ៊ុយក្រែននេះទៀតសោទ ​បានជំរុញឲ្យ​យើង​បន្ត​កិច្ច​សហប្រតិបត្តិការ​ជិតស្និទ្ធផងដែរ ។

ក្នុងអំឡុងសន្និសីទសន្តិសុខនៅទីក្រុងប្លាទីស្លាវ៉ា ប្រទេសស្លូវ៉ាគី កាលពីខែឧសភា លោក Macron ក៏បានជំរុញឲ្យប្រទេសលោកខាងលិចផ្តល់ការធានាសន្តិសុខរឹងមាំដល់អ៊ុយក្រែន ហើយថែមទាំងបើកផ្លូវឲ្យប្រទេសនេះឆ្ពោះទៅរកសមាជិកភាពអង្គការណាតូផងដែរ ។

ពាក់ព័ន្ធនឹងបញ្ហានេះដែរ ប្រទេសដែលជាសមាជិកអង្គការណាតូ នឹងផ្ដល់មតិយោបល់ទៅនឹងសំណើរបស់អ៊ុយក្រែនក្នុងការចូលរួមជាមួយនឹងសម្ព័ន្ធភាពយោធាមួយនេះ នៅក្នុងកិច្ចប្រជុំកំពូលដែលនឹងប្រព្រឹត្តទៅនៅរដ្ឋធានីវីលនីញូស របស់ប្រទេសលីទុយអានីនាថ្ងៃទី១១ ដល់ថ្ងៃទី១២ ខែកក្កដាខាងមុខនេះ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ លោក Biden ពន្យារពេលកិច្ចប្រជុំជាមួយប្រមុខអង្គការ ណាតូ ព្រោះតែ ឈឺធ្មេញ