កុំច្រឡំ! រូបភាពដែលចែកចាយពេញបណ្តាញសង្គម មិនមែនជាបំណែកយានជ្រមុជទឹក Titan ទេ

រូបភាពស្បែកជើងនៅបាតមហាសមុទ្រ ដែលមនុស្សមួយចំនួនកំពុងចែកចាយពាសពេញបណ្តាញសង្គម គឺជារូបចាស់ដែលគេថតបានពេលចុះទៅស្រាវជ្រាវនៅតំបន់កប៉ាល់ទីតានិក មិនមែនជារូបពាក់ព័ន្ធនឹងយានជ្រមុជទឹក Titan ទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រូបភាពនេះត្រូវបានចែកចាយព្រោងព្រាតពាសពេញបណ្តាញសង្គមដូចជា Facebook, Twitter និង TikTok ខណៈអ្នកលេងអ៊ីនធើណិតមួយចំនួនអះអាងថា ជាកម្ទេចកម្ទីយាន Titan។

ពួកគេបានបង្ហោះរូបភាពនេះ បន្ទាប់ពីឆ្មាំឆ្នេរសមុទ្រអាមេរិកប្រកាសកាលពីថ្ងៃព្រហស្បតិ៍ទី២២ខែមិថុនាថា បំណែកនៃយានជ្រមុជទឹករបស់ក្រុមហ៊ុន OceanGate ត្រូវបានរកឃើញហើយ។

ទោះបីជាយ៉ាងណាក៏ដោយ រូបភាពនេះមិនមែនជាបំណែករបស់យាន Titan ទេ ប៉ុន្តែវាជាសំណល់ពីកប៉ាល់ ទីតានិកដែលថតបានកាលពីឆ្នាំ២០០៤ ប៉ុណ្ណោះហើយរូបភាពរបស់យាន Titan មិនទាន់ត្រូវបានគេបញ្ចេញឲ្យឃើញឡើយ។

មិនត្រឹមប៉ុណ្ណឹង រូបភាពនេះ ត្រូវបានគេប្រើប្រាស់រួចទៅហើយ ក្នុងអត្ថបទព័ត៌មានមុនៗដែលចុះផ្សាយអំពីការលិចកប៉ាល់ដ៏ល្បីល្បាញក្នុងឆ្នាំ១៩១២។

រូបភាពដើម គឺត្រូវបានផ្តល់ដោយវិទ្យាស្ថានស្រាវជ្រាវ និងរុករកមហាសមុទ្រនៃសាកលវិទ្យាល័យ Rhode Island និងការិយាល័យរដ្ឋបាលមហាសមុទ្រនិងបរិយាកាសជាតិនៃការរុករកមហាសមុទ្រ៕

ប្រែសម្រួល៖ Vann Vann

ប្រភព៖ Sky

ចុចអាន៖ មហាសេដ្ឋីអង់គ្លេសដែលស្លាប់ក្នុងយាន Titan មានកាន់កាប់កំណត់ត្រាពិភពលោក ដល់ទៅ៣