លោក ស៊ី ជីនពីង ព្រមានមេដឹកនាំពិភពលោកប្រឆាំងនឹង “សង្គ្រាមត្រជាក់ថ្មី”

ប្រធានាធិបតីចិនលោក ស៊ី ជីនពីង បានព្រមានមេដឹកនាំពិភពលោកប្រឆាំងនឹងការចាប់ផ្តើម “សង្រ្គាមត្រជាក់ថ្មី” និងបានជំរុញឲ្យមានឯកភាពគ្នានៅចំពោះមុខការឆ្លងរាលដាលនៃជំងឺកូវីដ ១៩ ។

លោក ស៊ី បានថ្លែងសុន្ទរកថាបែបនេះតាមវីដេអូក្នុងព្រឹត្តិការណ៍វេទិកាសេដ្ឋកិច្ចពិភពលោកកាលពីថ្ងៃចន្ទ ។

ការព្រមានរបស់លោកប្រឆាំងនឹង “សង្រ្គាមត្រជាក់ថ្មី” ដែលរួមទាំងការគំរាមកំហែងដល់អ្នកដទៃ និងការដាក់ទណ្ឌកម្មដោយចេតនាបានកើតឡើង ចំពេលមានភាពតានតឹងកើនឡើងជាមួយសហរដ្ឋអាមេរិក ខណៈអតីតប្រធានាធិបតី ដូណាល់ ត្រាំ បានប្រកាន់ជំហរប្រឈមនឹងទីក្រុងប៉េកាំង ។

លោកបាននិយាយថា ចលនាបែបនេះនឹងនៅតែជំរុញពិភពលោកឲ្យបែកបាក់ ហើយថែមទាំងប្រឈមមុខគ្នាទៀតផងដែរ ។

លោក ស៊ី ក៏បាននិយាយដែរថា “អភិបាលកិច្ចអន្តរជាតិគួរតែផ្អែកលើគោលការណ៍ និងឈានដល់ការមូលមតិគ្នាក្នុងចំណោមយើងមិនមែនផ្អែកលើបទបញ្ជាដែលបានផ្តល់ឲ្យដោយប្រទេសមួយ ឬពីរបីនោះទេ” ។

នេះជាលើកទីមួយហើយដែលលោក ស៊ី បានថ្លែងទៅកាន់ការប្រជុំអន្តរជាតិចាប់តាំងពីលោក បៃដិន ចូលកាន់តំណែង ។

លោក ស៊ី បានសង្កត់ធ្ងន់ថា ទីក្រុងប៉េកាំងមានឆន្ទៈសហការជាមួយសហគមន៍អន្តរជាតិ ។

លោកបាននិយាយថា “វាមិនផ្តល់ផលប្រយោជន៍ដល់អ្នកណាម្នាក់ក្នុងការប្រើជំងឺរាតត្បាតជាលេសដើម្បីបញ្ច្រាសសកលភាវូបនីយកម្មនោះទេ ហើយវាកំពុងឆ្ពោះទៅរកភាពឯកោ និងការដួលរលំ ។ បញ្ហាដែលពិភពលោកកំពុងប្រឈមគឺសាំញ៉ាំ និងស្មុគស្មាញ” ។

លោកបានបន្ថែមថា “ផ្លូវចេញពីពួកគេគឺតាមរយៈការលើកកម្ពស់ពហុភាគីនិយម និងការកសាងសហគមន៍មួយដែលមានអនាគតរួមគ្នាសម្រាប់មនុស្សជាតិ” ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ កម្មករអណ្ដូងរ៉ែមាសចិន ១០ នាក់ដែលបាត់ដំណឹង ឥឡូវរកឃើញហើយ ៩ នាក់ស្លាប់

ចុចអាន ៖ ទីបំផុត កម្មកររ៉ែមាសចិនដែលជាប់ក្រោមដី ១៤ ថ្ងៃត្រូវបានជួយសង្គ្រោះ (មានវីដេអូ)