រលកកម្តៅ ជា “ឃាតកលាក់មុខ” សម្លាប់មនុស្សបន្តបន្ទាប់ នៅអឺរ៉ុប

អ្នកជំនាញព្រមានថា រលកកម្តៅដ៏បំផ្លិចបំផ្លាញនៅអឺរ៉ុបខាងត្បូង គឺជា “ឃាតកលាក់មុខ”កំពុងសម្លាប់មនុស្សយ៉ាងច្រើន ខណៈសីតុណ្ហភាពកើនឡើងលើស ៥០ អង្សាសេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្តៅដ៏ខ្លាំង ដែលបានសម្លាប់មនុស្សនិងបង្កជាភ្លើងឆេះព្រៃយ៉ាងសន្ធោសន្ធៅ បាននាំឲ្យទីក្រុងចំនួន១៦របស់ប្រទេសអ៊ីតាលី ត្រូវប្រកាសអាសន្នអាកាសធាតុដ៏កម្រ។

បច្ចុប្បន្នអ៊ីតាលី ស្ថិតនៅក្នុងដំណាក់កាលដ៏គួរឲ្យបារម្ភ ព្រោះប្រទេសនេះ ចាប់ផ្តើមមានអ្នកបាត់បង់ជីវិតដោយសាររលកកម្តៅដ៏សាហាវដែលគេឲ្យឈ្មោះថា “Cerberus” ខណៈនៅទីក្រុងរ៉ូម អ្នកទេសចរជនជាតិអង់គ្លេស ត្រូវបានគេប្រទះឃើញដួលសន្លប់ក្រោមកម្តៅថ្ងៃដ៏ក្តៅគគុក។

ដោយឡែកនៅប្រទេសអេស្ប៉ាញឯណោះវិញបានជួបប្រទះនឹងសីតុណ្ហភាព ៤៤ អង្សាសេ ដូចគ្នាទៅនឹងប្រទេសក្រិកដែរ ខណៈរលកកម្ដៅនេះ ហាក់ដូចជាមិនមានសញ្ញាថមថយនោះទេ ។

លក្ខខណ្ឌអាកាសធាតុ ​ត្រូវ​បាន​គេ​រំពឹង​ថា​នឹង​អូសបន្លាយពេល​ពីរ​សប្តាហ៍​ទៀត ​ដោយ​ប្រទេស​ស៊ីបជួបប្រទះកម្តៅ ៤១ អង្សាសេ, ក្រូអាត ៣៩ អង្សាសេ និង​​បារាំង ៣៤ អង្សាសេ។

ចំណែកនៅប្រទេសស្វីស អ្នកពន្លត់អគ្គិភ័យចំនួន ១៥០ នាក់ កំពុងញាប់ដៃញាប់ជើង ពន្លត់ភ្លើងឆេះព្រៃ ដែលកំពុងឆេះគ្រប់គ្រងលែងបាន ហើយរាលដាលយ៉ាងឆាប់រហ័ស។

ស្របពេលជាមួយគ្នានេះ នៅសហរដ្ឋអាមេរិក ឯណោះវិញ មនុស្សជាង១០៤លាននាក់ ត្រូវបានអជ្ញាធរ ព្រមានឲ្យប្រុងប្រយ័ត្នចំពោះកម្តៅ ខណៈរដ្ឋាភិបាលកាណាដានិយាយថា ភ្លើងឆេះព្រៃ បានឆាបឆេះយ៉ាងសន្ធោសន្ធៅលើផ្ទៃដីចំនួន ១០ លានហិកតាក្នុងឆ្នាំនេះ ហើយការខូចខាតនឹងមានបន្ថែមទៀត បើរដូវក្តៅនៅតែអូសបន្លាយ៕

ប្រែសម្រួល៖ Vann Vann

ប្រភព៖ Mirror, BBC

ចុចអាន៖ ពិភពលោក កំពុងរងគ្រោះធ្ងន់ធ្ងរ ដោយទឹកជំនន់និងរលកកម្តៅ ក្នុងពេលតែមួយ