រុស្ស៊ី ទម្លាយតួលេខ អ្នកចុះឈ្មោះចូលបម្រើកងទ័ព ក្នុងឆ្នាំនេះ

អនុប្រធានក្រុមប្រឹក្សាសន្តិសុខជាតិ លោក Dmitry Medvedev បាននិយាយកាលពីថ្ងៃព្រហស្បតិ៍ទី៣ខែសីហាថា ពលរដ្ឋរុស្ស៊ីជិត ២៥០០០០នាក់ បានចុះឈ្មោះ ចូលបម្រើកងទ័ពក្នុងឆ្នាំនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Medvedev បានកត់សម្គាល់ក្នុងកិច្ចប្រជុំក្រុមប្រឹក្សា នៅទីក្រុងមូស្គូថា “យោងតាមកំណត់ត្រារបស់ក្រសួងការពារជាតិ មនុស្សជាង ២៣១០០០នាក់ បានចុះហត្ថលេខាលើកិច្ចសន្យាចូលបម្រើការងារនៅចន្លោះថ្ងៃទី១ខែមករា ដល់ថ្ងៃទី៣ខែសីហា”។

លោក Medvedev បានចង្អុលបង្ហាញថា អ្នកដែលចុះឈ្មោះ ទទួលបានប្រាក់រង្វាន់ មានថ្ងៃឈប់សម្រាកទទួលបានប្រាក់ ហើយត្រូវបានធានានូវការងារចាស់របស់ពួកគេ នៅពេលកាតព្វកិច្ចយោធាបានបញ្ចប់។

កាលពីចុងខែមិថុនា រដ្ឋមន្ត្រីការពារជាតិ Sergey Shoigu បានរាយការណ៍ទៅលោកប្រធានាធិបតី Vladimir Putin ថា អត្រាចុះឈ្មោះគឺគ្រប់គ្រាន់ សម្រាប់ការបង្កើនកងវរសេនាធំទាំងមូល ដោយនៅពេលនោះ ចំនួនយោធាកិច្ចសន្យា មានប្រមាណ១៥០០០០នាក់។

គួរបញ្ជាក់ថា ទីក្រុងមូស្គូបានកែនទាហានបម្រុងចំនួន៣០០០០០នាក់នៅក្នុងខែកញ្ញាឆ្នាំ២០២២។ ទោះបីជាយ៉ាងណាក៏ដោយ លោក ពូទីន បាននិយាយជាច្រើនលើកច្រើនសាមកហើយថា មិនចាំបាច់មានការចល័តទ័ពទៀតទេ៕

ប្រែសម្រួល៖ Vann Vann

ប្រភព៖ RT

ចុចអាន៖ រុស្ស៊ី បាញ់មីស៊ីលដាក់ស្រុកកំណើតលោក Zelensky សម្លាប់មនុស្ស ៦នាក់