ឥណ្ឌា បញ្ចេញវីដេអូនិងរូបភាពដំបូង ដែលយានអវកាសរបស់ខ្លួន ថតបានពីឋានព្រះចន្ទ

អង្គការស្រាវជ្រាវអវកាសឥណ្ឌា (ISRO) បានប្រកាសកាលពីថ្ងៃអាទិត្យទី៦ខែសីហាថា យានអវកាស Chandrayaan-3 របស់ឥណ្ឌា បានសម្រេចបេសកកម្មនៅគន្លងព្រះចន្ទជាលើកដំបូង។

វីដេអូមួយ ដែលចែករំលែកដោយក្រុម Chandrayaan-3 នៅលើបណ្តាញសង្គម X បានបង្ហាញពីទិដ្ឋភាពដ៏អស្ចារ្យនៃព្រះចន្ទ ដែលថតដោយកាមេរ៉ានៅលើយានអវកាសក្នុងអំឡុងពេលចូលទៅជិត។

ប្រតិបត្តិការបន្ទាប់ដើម្បីចូលកាន់តែជិតជាងនេះទៅទៀត គឺគ្រោងធ្វើឡើងនៅថ្ងៃទី៩ខែសីហាខាងមុខ ហើយក្រោយមកទៀត យានអវកាសនឹងព្យាយាមចុះចតលើផ្ទៃព្រះចន្ទនៅថ្ងៃទី២៣ខែសីហា។

គួរបញ្ជាក់ថា Chandrayaan-3 ដែលជាបេសកកម្មរុករកឋានព្រះចន្ទរបស់ឥណ្ឌាទីបី គឺត្រូវបានដាក់ឲ្យដំណើរការនៅថ្ងៃទី១៤ខែកក្កដា ហើយមានគោលបំណងចុះចត លើផ្ទៃព្រះចន្ទ។

ប្រសិនបើបេសកកម្មនេះទទួលជោគជ័យមែន នោះឥណ្ឌានឹងក្លាយជាប្រទេសទី៤ ដែលសម្រេចការចុះចតលើឋានព្រះចន្ទ បន្ទាប់ពីសហរដ្ឋអាមេរិក សហភាពសូវៀត និងចិន៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ RT

ចុចអាន៖ អឺរ៉ុប បញ្ជូនយានអវកាស ទៅរកមនុស្សក្រៅភព