លោក បៃដិន ប្រកាសអាសន្ននៅ ហាវ៉ៃ ខណៈមនុស្សស្លាប់ដោយសារភ្លើងឆេះព្រៃ កើនដល់ ៥៣នាក់

ប្រធានាធិបតីអាមេរិកលោក ចូ បៃដិន បានប្រកាសដាក់រដ្ឋហាវ៉ៃ ជាតំបន់គ្រោះមហន្តរាយ បន្ទាប់ពីភ្លើងឆេះព្រៃដ៏ធំ បានសម្លាប់មនុស្សយ៉ាងតិច ៥៣នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្លើងឆេះព្រៃដែលជំរុញដោយរដូវក្តៅដ៏ស្ងួតនិងខ្យល់បក់ខ្លាំង ក៏បានបង្ខំឲ្យមនុស្សរាប់ម៉ឺននាក់រត់គេចខ្លួន និងបំផ្លាញផ្នែកខ្លះនៃទីក្រុងប្រវត្តិសាស្ត្រ Lahaina ដែលជាកន្លែងទាក់ទាញដ៏សំខាន់មួយនៅលើកោះ Maui ផងដែរ។

សេចក្តីប្រកាសគ្រោះមហន្តរាយដោយលោក បៃដិន នឹងត្រួសត្រាយផ្លូវឲ្យមានការយកជំនួយសហព័ន្ធទៅជួយសហគមន៍ដែលរងផលប៉ះពាល់។

ស្របពេលជាមួយគ្នានោះ កិច្ចខិតខំប្រឹងប្រែងជម្លៀសទ្រង់ទ្រាយធំ សម្រាប់ភ្ញៀវទេសចរនិងប្រជាពលរដ្ឋកំពុងដំណើរការ ដោយរថយន្តក្រុង បានដឹកមនុស្សចេញពីតំបន់ Kaanapali ភាគខាងជើងទីក្រុង Lahaina។

អ្នកទេសចរនឹងត្រូវដឹកត្រង់ ឆ្ពោះទៅកាន់អាកាសយានដ្ឋាន Kahului តែម្តងខណៈអ្នកស្រុកត្រូវនាំទៅកាន់ជម្រកនៅកណ្តាលកោះ Maui។

គួរបញ្ជាក់ថា មានភ្លើងឆេះយ៉ាងសកម្មចំនួនប្រាំមួយ នៅលើកោះ Maui និងកោះធំរបស់រដ្ឋ ហាវ៉ៃ ដោយផ្ទៃដីប្រហែល២០០០ហិកតា បានឆេះខ្ទេចអស់ទៅហើយ។

លើសពីនេះ ក្រុមអ្នកពន្លត់អគ្គិភ័យ កំពុងបន្តកិច្ចខិតខំប្រឹងប្រែងដើម្បីការពាររចនាសម្ព័ន្ធ និងពន្លត់ភ្លើងដែលកំពុងឆេះនៅលើកោះ Maui៕

ប្រែសម្រួល៖ Vann Vann

ប្រភព៖ SKY

ចុចអាន៖ ភ្លើងឆេះព្រៃនៅ ហាវ៉ៃ ដុតកម្ទេចទីក្រុង ប្រវត្តិសាស្ត្រមួយ ស្ទើរតែទាំងស្រុង