ខានស្អែក ជប៉ុន នឹងបញ្ចេញទឹកសំណល់ពីរោងចក្រនុយក្លេអ៊ែរ ហ្វូគូស៊ីម៉ា ចូលមហាសមុទ្រប៉ាស៊ីហ្វិក

ទឹកសំណល់ពីរោងចក្រនុយក្លេអ៊ែរ ហ្វូគូស៊ីម៉ា ដែលរងគ្រោះដោយរលកយក្សស៊ូណាមិ នឹងត្រូវប្រទេសជប៉ុន បញ្ចេញចូលទៅក្នុងមហាសមុទ្រប៉ាស៊ីហ្វិកនៅថ្ងៃព្រហស្បតិ៍ទី២៤ខែសីហានេះ ថ្វីបើមានការប្រឆាំងពីអ្នកជិតខាងក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការ​សម្រេច​ចិត្ត​ ធ្វើ​ឡើង​ប៉ុន្មាន​សប្តាហ៍​បន្ទាប់​ពីស្ថាប័ន​ឃ្លាំ​មើល​នុយក្លេអ៊ែរ​របស់​អង្គការ​សហ​ប្រជាជាតិ ​បាន​អនុម័ត​គម្រោង​នេះ។

ទឹកប្រហែល១.៣៤លានតោន បានប្រមូលផ្តុំ ចាប់តាំងពីរលកយក្សស៊ូណាមិឆ្នាំ២០១១ បំផ្លាញរោងចក្រនេះ ហើយទឹកនឹងត្រូវបញ្ចេញក្នុងរយៈពេល៣០ឆ្នាំ បន្ទាប់ពីការបន្សុទ្ធ។

នាយករដ្ឋមន្ត្រីជប៉ុនលោក Fumio Kishida បាននិយាយបន្ទាប់ពីកិច្ចប្រជុំគណៈរដ្ឋមន្ត្រីនៅថ្ងៃអង្គារទី២២ខែសីហាថា អាជ្ញាធរនឹងស្នើឲ្យប្រតិបត្តិកររោងចក្រនេះ រៀបចំភ្លាមៗ សម្រាប់ការបញ្ចេញដែលចាប់ផ្តើមនៅថ្ងៃទី២៤ខែសីហា ប្រសិនបើអាកាសធាតុ និងលក្ខខណ្ឌសមុទ្រអំណោយផល។

រដ្ឋាភិបាលនិយាយថា ការបញ្ចេញទឹកនេះ គឺជាជំហានចាំបាច់មួយក្នុងដំណើរការរុះរើរោងចក្រ ដែលស្ថិតនៅលើឆ្នេរសមុទ្រភាគខាងកើតរបស់ប្រទេស ចម្ងាយប្រហែល២២០គីឡូម៉ែត្រ ពីរាជធានីតូក្យូ។

គួរបញ្ជាក់ថា រលកយក្សស៊ូណាមិឆ្នាំ២០១១ ដែលបង្កឡើងដោយគ្រោះរញ្ជួយដីកម្រិត ៩.០ រ៉ិចទ័រ ត្រូវបានគេចាត់ទុកថាជាគ្រោះមហន្តរាយនុយក្លេអ៊ែរអាក្រក់បំផុតរបស់ពិភពលោក ចាប់តាំងពីព្រឹត្តិការណ៍ Chernobyl។

មិនយូរប៉ុន្មាន អាជ្ញាធរបានបង្កើតតំបន់ពិសេសមួយ ដែលពង្រីកបន្ថែម នៅពេលជាតិវិទ្យុសកម្មលេចចេញពីរោងចក្រ បង្ខំឲ្យមនុស្សជាង១៥០០០០នាក់ ត្រូវជម្លៀសចេញពីតំបន់នោះ៕

ប្រែសម្រួល៖ Vann Vann

ប្រភព៖ BBC

ចុចអាន៖ IAEA ស្នើជប៉ុនពិនិត្យសំណល់ទឹកចេញពីរោងចក្រនុយក្លេអ៊ែរ