ធ្លាក់យន្តហោះរបស់មេទាហានស៊ីឈ្នួលរុស្ស៊ី លោក Prigozhin គ្មាននរណានៅរស់ឡើយ

ប្រធានក្រុមហ៊ុនយោធាឯកជន Wagner លោក Yevgeny Prigozhin មានឈ្មោះក្នុងបញ្ជីអ្នកដំណើរ ដែលធ្វើដំណើរតាមយន្តហោះឯកជនរបស់គាត់ ដែលធ្លាក់កាលពីថ្ងៃពុធទី២៣ខែសីហា នៅតំបន់ Tver នៃប្រទេសរុស្ស៊ី។ នេះបើតាមការបញ្ជាក់ ពីទីភ្នាក់ងារដឹកជញ្ជូនផ្លូវអាកាសសហព័ន្ធរបស់ប្រទេសរុស្ស៊ី Rosaviatsiya។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របពេលជាមួយគ្នានោះ ក្រសួងគ្រាអាសន្នរុស្ស៊ីអះអាងថា មនុស្ស១០នាក់ នៅលើយន្តហោះឯកជន ដែលធ្វើដំណើរពីទីក្រុងមូស្គូទៅកាន់ St. Petersburg គឺស្លាប់ទាំងអស់។

មន្ត្រីម្នាក់បានប្រាប់ TASS ថា “យន្តហោះ Embraer មួយគ្រឿងនេះ មានអាកាសយានិក ៣នាក់ និងអ្នកដំណើរ ៧ នាក់ជិះក្នុងនោះ។ ពួកគេគ្មាននរណាម្នាក់ នៅរស់ឡើយ”។

ថ្វីបើមិនមានការបញ្ជាក់ថា គាត់ពិតជាជិះក្នុងយន្តហោះដែលធ្លាក់មែនឬក៏អត់នោះក៏ដោយ ប៉ុន្តែសារព័ត៌មានជាច្រើនសន្មត់ថា លោក Prigozhin បានបាត់បង់ជីវិតហើយ។

គ្រោះថ្នាក់នេះបានកើតឡើងនៅជិតភូមិ Kuzhenkino ក្នុងតំបន់ Tver ភាគពាយ័ព្យ។ សារព័ត៌មានរបស់រុស្ស៊ីមួយចំនួន បានកំណត់យន្តហោះនេះមានឈ្មោះថា Embraer Legacy 600 មានលេខកន្ទុយ RA-02795 ដែលគេជឿថាជារបស់លោក Prigozhin។

ទោះបីជាយ៉ាងណាក៏ដោយ មកទល់ពេលនេះ សាកសពទើប៨នាក់ប៉ុណ្ណោះ ដែលត្រូវបានរកឃើញ។

Rosaviatsiya និយាយថា ខ្លួនបានបង្កើតគណៈកម្មការពិសេសមួយ ដើម្បីស៊ើបអង្កេតមូលហេតុ និងកាលៈទេសៈនៃឧបទ្ទវហេតុនេះ៕

ប្រែសម្រួល៖ Vann Vann

ប្រភព៖ RT

ចុចអាន៖ លេចមុខលើកនេះ មេទាហានស៊ីឈ្នួល Wagner ប្តេជ្ញាធ្វើឲ្យ រុស្ស៊ី កាន់តែអស្ចារ្យនៅគ្រប់កន្លែង