អាមេរិកគំរាមលូកដៃ បើកងទ័ពមីយ៉ាន់ម៉ាមិនដោះលែងលោកស្រី ស៊ូជី

សហរដ្ឋអាមេរិកនៅថ្ងៃចន្ទនេះបានទទូចដល់យោធាមីយ៉ាន់ម៉ាឲ្យដោះលែងមន្ត្រីដែលត្រូវបានឃុំខ្លួនរួមទាំងមេដឹកនាំលោកស្រី អ៊ុងសាន ស៊ូជី និងបានព្រមានអំពីការឆ្លើយតបពីទីក្រុងវ៉ាស៊ីនតោនជុំវិញការធ្វើរដ្ឋប្រហារ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី ស៊ូជី និងប្រធានាធិបតីរបស់ប្រទេសត្រូវបានចាប់ខ្លួន និងឃុំឃាំង បន្ទាប់ពីមានភាពតានតឹងកើនឡើងរវាងរដ្ឋាភិបាលស៊ីវិល និងយោធាជុំវិញការចោទប្រកាន់អំពីការលួចបន្លំក្នុងការបោះឆ្នោតកាលពីខែវិច្ឆិកា ។

អ្នកនាំពាក្យសេតវិមានលោកស្រី Jen Psaki បាននិយាយនៅក្នុងសេចក្តីថ្លែងការណ៍មួយថា “សហរដ្ឋអាមេរិកប្រឆាំងនឹងការប៉ុនប៉ងណាមួយដើម្បីផ្លាស់ប្តូរលទ្ធផលនៃការបោះឆ្នោតនាពេលថ្មីៗនេះ ឬរារាំងការផ្លាស់ប្តូរលទ្ធិប្រជាធិបតេយ្យរបស់មីយ៉ាន់ម៉ា ហើយនឹងចាត់វិធានការប្រឆាំងនឹងអ្នកដែលទទួលខុសត្រូវ ប្រសិនបើជំហានទាំងនេះមិនត្រូវបានផ្លាស់ប្ដូរ” ។

លោកស្រីបានបន្ថែមទៀតថា “យើងជំរុញឲ្យយោធា និងគណបក្សដទៃទៀតគោរពនូវបទដ្ឋានលទ្ធិប្រជាធិបតេយ្យ និងនីតិរដ្ឋ និងដោះលែងអ្នកដែលត្រូវបានឃុំខ្លួននៅថ្ងៃនេះ” ។

រឿងនេះបានកើតឡើង បន្ទាប់ពីយោធាមីយ៉ាន់ម៉ាបានប្រកាសគ្រប់គ្រងប្រទេសក្នុងរដ្ឋប្រហារ ខណៈដែកាលពីសប្តាហ៍មុនយោធាបានផ្តល់សញ្ញាថាខ្លួនអាចដណ្តើមអំណាចដើម្បីដោះស្រាយការអះអាងរបស់ខ្លួនអំពីភាពមិនប្រក្រតីនៅក្នុងការបោះឆ្នោតដែលគណបក្សសម្ព័ន្ធជាតិដើម្បីប្រជាធិបតេយ្យ (NLD) របស់លោកស្រី ស៊ូជី បានឈ្នះយ៉ាងភ្លូកទឹកភ្លូកដី ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ កងទ័ពចាប់ខ្លួន លោកស្រី ស៊ូជី និងប្រធានាធិបតីមីយ៉ាន់ម៉ា

ចុចអាន ៖ យោធាមីយ៉ាន់ម៉ាប្រកាសកាន់កាប់ប្រទេសក្នុងរដ្ឋប្រហារ