ស្ត្រីវៀតណាម ១១ នាក់ ត្រូវគេបោកលក់ឲ្យបុរសចិនយកធ្វើជាប្រពន្ធ

ឃាត់ខ្លួនមនុស្ស ៦ នាក់នៅខេត្ត Bac Lieu ប្រទេសវៀតណាម ពីបទឆបោកស្ត្រី ១១ នាក់ ដើម្បីលក់ពួកគេឲ្យបុរសចិនយកធ្វើជាប្រពន្ធ ។

អ្នកលក់មានឈ្មោះ Luong Thi Hai អាយុ ៣១ ឆ្នាំ Pham Thi Tu អាយុ ៦១ ឆ្នាំ និង​មនុស្ស ៤ នាក់​ទៀត បានជួញដូរមនុស្សខុសច្បាប់ ដែលក្នុងនោះមានក្មេងស្រីអាយុក្រោម ១៦ ឆ្នាំ និងមនុស្សមានជំងឺផ្លូវចិត្តផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅឆ្នាំ ២០១៥ Luong Thi Hai បានធ្វើដំណើរទៅប្រទេសចិនជាកម្មករ ហើយរៀបការនៅទីនោះ ។ បន្ទាប់ពីដឹងថា បុរសចិនជាច្រើនចង់បានប្រពន្ធវៀតណាម នាងសម្រេចចិត្តបោកស្រីៗ ដើម្បីយកពួកគេមកលក់តែម្ដង ។

ក្នុងឆ្នាំ ២០១៨ Hai បានស្គាល់ Tu និង Huynh Mong Linh អាយុ ៤៥ ឆ្នាំ តាមរយៈក្រុមមេអណ្ដើកឲ្យស្ត្រីវៀតណាម និងបុរសបរទេស ។ ពួកគេព្យាយាមស្វែងរកស្ត្រីមានស្ថានភាពលំបាក ឬមិនសូវចេះដឹង និងទើបតែលែងលះ ហើយបញ្ចុះបញ្ចូលឲ្យយកប្ដីចិន ។

ស្រីៗត្រូវថតរូបខ្លួនឯង អត្តសញ្ញាណប័ណ្ណ ហើយរង់ចាំគេបញ្ជូនទៅព្រំដែនតាមផ្លូវទៅប្រទេសចិន គឺខេត្ត Lang Son និង Cao Bang ដែលមានតម្លៃធ្វើដំណើរ ១ ៦៦០ ដុល្លារ ។

ទៅដល់ប្រទេសចិនភ្លាម ពួកគេនឹងត្រូវបានឃុំនៅសណ្ឋាគារក្នុងខេត្ត Henan ដើម្បីទុកឲ្យបុរសចិនអ្នករើស ។ ស្ត្រីណាដែលមិនព្រមនឹងត្រូវគេគម្រាម ឬប្រើអំពើហិង្សាលើយ៉ាងដំណំ ។

សម្រាប់តម្លៃខ្លួនវិញ បុរសចិននឹងឲ្យពី ៨ ០០០ ទៅ ១៦ ០០០ ដុល្លារក្នុងម្នាក់ ប៉ុន្តែប្រាក់ដល់ដៃគ្រួសារស្ត្រីរងគ្រោះបានត្រឹម ៨០០ ដុល្លារ ទៅ ៤ ០០០ ដុល្លារប៉ុណ្ណោះ ។

ក្រោយ​រៀបការ​រួច ជនរងគ្រោះ​ប្រឈមនឹង​ត្រូវ​ប្តី​វាយធ្វើបាប​ ហើយទាមទារឲ្យសងប្រាក់ដែលទទួលបាន ក្នុងករណីចង់ត្រឡប់ទៅផ្ទះវិញ ។ អាជ្ញាធរបានឲ្យដឹងថា ចន្លោះឆ្នាំ ២០១៩ ដល់ឆ្នាំ ២០២២ ក្រុមអ្នកជួញដូររកចំណូលបានដល់ទៅ ៤០ ០០០ ដុល្លារ ៕

ប្រែសម្រួល៖ វារី

ប្រភព៖ vnexpress

ចុចអាន៖ ស្រុកមួយនៅចិន ផ្តល់រង្វាន់សម្រាប់គូស្នេហ៍ ប្រសិនបើកូនក្រមុំមានវ័យក្មេង