ព័ត៌មានអន្ដរជាតិ

ក្មេងប្រុសម្នាក់នៅ រុស្ស៊ី ត្រូវហ្វូងឆ្កែព្រៃវាយប្រហារ រហូតលោតចូលសមុទ្រ

បានផុស

៧ ខែ មុន

នៅ

ថ្ងៃសៅរ៍ ២ កញ្ញា ២០២៣

ដោយ

កាលពីពេលថ្មីៗនេះ ហេតុការណ៍ដ៏កម្រមួយបានកើតឡើងនៅឆ្នេរសមុទ្រក្បែរតំបន់លំនៅដ្ឋាន នៃទីក្រុង Makhachkala (សាធារណរដ្ឋ Dagestan សហព័ន្ធរុស្ស៊ី) កាលពីថ្ងៃទី ២៧ខែសីហា ដែលទាក់ទាញការចាប់អារម្មណ៍យ៉ាងខ្លាំងពីបណ្ដាញអ៊ីនធឺណិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វីដេអូឃ្លិបនេះថតបានពីកន្លែងកើតហេតុ ក្មេងប្រុសម្នាក់ត្រូវឆ្កែមួយក្រុមវាយប្រហារនៅក្បែរឆ្នេរ។ ក្មេងនេះប្រៀបដូចជាអត្តពលិកអាជីព ប្រញាប់ប្រញាល់រត់គេចពីការតាមប្រមាញ់របស់ឆ្កែព្រៃយ៉ាងរហ័ស។

ទោះជាយ៉ាងណាក៏ដោយ ត្រឹមតែប៉ុន្មានវិនាទីប៉ុណ្ណោះ ហ្វូងសត្វឆ្កែបានដេញតាមកន្លែងហើយហ៊ុំព័ន្ធជុំវិញក្មេងប្រុស។ ដោយប្រឈមមុខនឹងស្ថានការណ៍ស្ទើរតែជាប់គាំងដោយគ្មានផ្លូវចេញ ក្មេងនោះស្រាប់តែសម្រេចចិត្តលោតចូលទៅក្នុងសមុទ្រដើម្បីរកវិធីសង្គ្រោះខ្លួនឯង ដោយទុកសត្វឆ្កែឈរនៅលើច្រាំង។ ក្រោយមក ពួកវាបានរង់ចាំក្មេងប្រុសតូចនោះឡើងមកច្រាំងយូរពេក ទើបចាកចេញដោយអស់សង្ឃឹម។

ទោះយ៉ាងណា ត្បិតថាបានរត់គេចខ្លួនយ៉ាងឆ្លាតវៃក៏ដោយ មុនពេលលោតចូលសមុទ្រ ក្មេងប្រុសដដែលនេះ ត្រូវបានឆ្កែព្រៃខាំជាច្រើនកន្លែង។ បច្ចុប្បន្នស្ថានភាពសុខភាពរបស់ក្មេងរូបនេះ មិនត្រូវបានគេប្រកាសឲ្យដឹងឡើយ ។

យ៉ាងណាមិញ ក្រោយបង្ហោះវីដេអូឃ្លិបនេះរួចមក ទទួលបានការចាប់អារម្មណ៍យ៉ាងខ្លាំងពីមជ្ឈដ្ឋានអនឡាញ។ មនុស្សជាច្រើនមិនអាចជួយអ្វីបាន ក្រៅពីមានការភ្ញាក់ផ្អើលដែលស្ថានការណ៍ដ៏គួរឲ្យភ្ញាក់ផ្អើលមិនខុសពីភាពយន្តបែបសកម្មភាពនោះទេ។ ក្នុងនោះ មានមតិចង់ដឹងជាច្រើនអំពីសុខភាពរបស់ជនរងគ្រោះ ក៏ដូចជាសរសើរពីភាពឆ្លាតវៃរបស់ក្មេងប្រុសនេះផងដែរ៕