ក្នុងកិច្ចប្រជុំអាស៊ានបូកបី, ចិន ព្រមានប្រឆាំង សង្រ្គាមត្រជាក់ថ្មី

ខណៈមន្ត្រីកំពូលអាស៊ី និងសហរដ្ឋអាមេរិក ជួបជុំគ្នាសម្រាប់កិច្ចពិភាក្សានៅក្នុងប្រទេសឥណ្ឌូណេស៊ី, នាយករដ្ឋមន្ត្រីចិន បាននិយាយកាលពីថ្ងៃពុធទី៦ខែកញ្ញាថា ប្រទេសមហាអំណាច ត្រូវតែគ្រប់គ្រងភាពខ្វែងគំនិតគ្នាឲ្យបាន និងចៀសវាង “សង្រ្គាមត្រជាក់ថ្មី”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទីក្រុងប៉េកាំង បានបង្ហាញក្តីព្រួយបារម្ភ អំពីប្លុកគាំទ្រដោយសហរដ្ឋអាមេរិក ដែលបានបង្កើតឡើងនៅមាត់ទ្វាររបស់ខ្លួន ខណៈខ្លួនក៏កំពុងប្រឈមមុខនឹងជម្លោះជាមួយមហាអំណាចផ្សេងៗនៅក្នុងតំបន់ ជុំវិញសមុទ្រចិនខាងត្បូង និងបញ្ហាដទៃទៀត ផងដែរ។

លោក Li Qiang បាននិយាយនៅពេលចាប់ផ្តើមកិច្ចប្រជុំអាស៊ានបូកបី ជាមួយប្រទេសជប៉ុន និងកូរ៉េខាងត្បូងនៅទីក្រុងហ្សាការតាថា “ភាពខ្វែងគំនិតគ្នានិងជម្លោះ អាចកើតឡើងរវាងប្រទេសនានា ដោយសារតែការយល់ខុស ការបង្វែរផលប្រយោជន៍ឬការជ្រៀតជ្រែកពីខាងក្រៅ។ ដើម្បីគ្រប់គ្រងភាពខ្វែងគំនិតគ្នាឲ្យបាន អ្វីដែលចាំបាច់នៅពេលនេះ គឺត្រូវប្រឆាំងការរើសអើង, ប្រឆាំងការប្រឈមមុខដាក់គ្នាក្នុងប្លុក និងប្រឆាំងសង្រ្គាមត្រជាក់ថ្មីមួយ”។

ដោយឡែក Li Qiang ក៏បានសង្កត់ធ្ងន់ផងដែរថា ប្រទេសចិនគាំទ្រជំហរអព្យាក្រឹត្យរបស់អាស៊ានសម្រាប់កិច្ចសហប្រតិបត្តិការក្នុងតំបន់ ហើយចិនក៏មានឆន្ទៈ ធ្វើការជាមួយភាគីទាំងអស់ ដើម្បីជំរុញឲ្យតំបន់អាស៊ីបូព៌ាក្លាយជាក្បាលម៉ាស៊ីនដ៏សំខាន់សម្រាប់ការអភិវឌ្ឍពិភពលោកផងដែរ។

លោក​បញ្ជាក់​ថា រដ្ឋាភិបាល​ក្រុង​ប៉េកាំង ​គាំទ្រ​យ៉ាង​ម៉ឺងម៉ាត់​ដល់​អាស៊ាន ​ក្នុង​ការ​ដើរ​តួនាទី​កាន់តែ​ខ្លាំង​ក្នុង​កិច្ចការ​អន្តរជាតិ។ ប្រទេសចិន បានត្រៀមខ្លួនជាស្រេចដើម្បីផ្លាស់ប្តូរទស្សនៈជាមួយភាគីទាំងអស់លើបញ្ហាសំខាន់ៗទាក់ទងនឹងកិច្ចសហប្រតិបត្តិការក្នុងតំបន់ ការពង្រឹងឯកភាព ការចែករំលែកឱកាសអភិវឌ្ឍន៍ និងការដោះស្រាយបញ្ហាប្រឈមនានា។

ការអត្ថាធិប្បាយរបស់នាយករដ្ឋមន្ត្រីចិន ធ្វើឡើងបន្ទាប់ពីរដ្ឋមន្ត្រីការពារជាតិទីក្រុងប៉េកាំងលោក Li Shangfu កាលពីខែមិថុនា បានព្រមានប្រឆាំងនឹងការបង្កើតសម្ព័ន្ធភាពដូចអង្គការណាតូនៅក្នុងតំបន់អាស៊ីប៉ាស៊ីហ្វិក។

ទីក្រុងវ៉ាស៊ីនតោន គឺជាសមាជិកនៃភាពជាដៃគូការពារជាតិរបស់ AUKUS ជាមួយអូស្ត្រាលី និងអង់គ្លេស ហើយជាសមាជិក Quad ដែលជាសម្ព័ន្ធមិត្តយុទ្ធសាស្ត្ររួមមានអូស្ត្រាលី ឥណ្ឌា និងជប៉ុន៕

ប្រែសម្រួល៖ Vann Vann

ប្រភព៖ CNA

ចុចអាន៖ ចិន គាំទ្រដល់តួនាទី អាស៊ាន ក្នុងកិច្ចការពិភពលោក