ឥណ្ឌា ​ផ្អាក​ទិដ្ឋាការ​សម្រាប់​ជនជាតិ​កាណាដា ខណៈ​ជម្លោះ​កាន់តែ​ក្តៅ​

ប្រទេសឥណ្ឌា បានផ្អាកសេវាផ្តល់ទិដ្ឋាការ សម្រាប់ពលរដ្ឋកាណាដា ដោយសារតែអ្វីដែលខ្លួននិយាយថា ជា “ការគំរាមកំហែងសន្តិសុខ” ប្រឆាំងនឹងអ្នកការទូតនៅក្នុងប្រទេសកាណាដា ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សកម្មភាពចុងក្រោយបំផុតនេះ បានធ្វើឲ្យជម្លោះរវាងប្រទេសទាំងពីរ កាន់តែក្តៅគគុកឈានដល់កម្រិតថ្មីមួយទៀត បន្ទាប់ពីទីក្រុងអូតាវ៉ា ចោទប្រកាន់ទីក្រុង ញូវដែលី ថានៅពីក្រោយ ការធ្វើឃាតសកម្មជនបំបែកខ្លួន Sikh លើទឹកដីរបស់ខ្លួន។

BLS International ដែលគ្រប់គ្រងការស្នើសុំទិដ្ឋាការសម្រាប់ប្រទេសឥណ្ឌា ក្នុងប្រទេសកាណាដា បានផ្ញើលិខិតមួយទៅកាន់ផ្សារហ៊ុនឥណ្ឌា កាលពីថ្ងៃព្រហស្បតិ៍ទី២១ខែកញ្ញា ដែលនិយាយថា​ សេវាកម្មទិដ្ឋាការ ត្រូវបានផ្អាករហូតដល់មានការជូនដំណឹងបន្ថែម។

លិខិតដែលផ្ញើទៅផ្សារហ៊ុន Bombay, ផ្សារហ៊ុនជាតិនៃប្រទេសឥណ្ឌា និងផ្សារហ៊ុនក្រុង មានខ្លឹមសារថា “ដោយសារតែហេតុផលប្រតិបត្តិការ ដែលចូលជាធរមានភ្លាមៗ ពោលគឺថ្ងៃទី២១ខែកញ្ញាឆ្នាំ២០២៣, សេវាទិដ្ឋាការឥណ្ឌានៅប្រទេសកាណាដា ត្រូវបានផ្អាករហូតដល់មានការជូនដំណឹងបន្ថែម”។

កន្លងមក BLS International ក៏បានបញ្ជាក់នៅលើគេហទំព័ររបស់ខ្លួនដែរថា ប្រទេសឥណ្ឌា បានផ្អាកសេវាកម្មទិដ្ឋាការសម្រាប់ពលរដ្ឋកាណាដាចាប់ពីថ្ងៃព្រហស្បតិ៍ទៅ។

ស្របពេលជាមួយគ្នានោះ ក្រសួងកិច្ចការបរទេសរបស់ឥណ្ឌានិយាយថា “ការគំរាមកំហែងផ្នែកសន្តិសុខ” ដែលគណៈកម្មាធិការជាន់ខ្ពស់ និងស្ថានកុងស៊ុលឥណ្ឌានៅក្នុងប្រទេសកាណាដាកំពុងប្រឈមមុខ ជាហេតុនាំឲ្យមានវិធានការបណ្តោះអាសន្ន នៃការបញ្ឈប់ការផ្តល់ទិដ្ឋាការគ្រប់ប្រភេទទាំងអស់។

គួរបញ្ជាក់ថា ការ​ប្រកាស​នេះ​​ធ្វើ​ឡើង ​បន្ទាប់​ពី​ក្រសួង​ការ​បរទេស​​ឥណ្ឌា ព្រមាន​ខ្លាំងៗអំពី​ការ​ធ្វើ​ដំណើរ ដោយ​ជំរុញ​ឲ្យ​ពលរដ្ឋ​របស់​ខ្លួន នៅ​កាណាដាត្រូវប្រុង​ប្រយ័ត្នខ្ពស់៕

ប្រែសម្រួល៖ Vann Vann

ប្រភព៖ CNN

ចុចអាន៖ ឥណ្ឌា ព្រមានពលរដ្ឋខ្លួននៅ កាណាដា ឲ្យប្រយ័ត្ន