លោក បៃដិន អាចជួបពិភាក្សាទល់មុខ ជាមួយលោក ស៊ី ក្នុងខែវិច្ឆិកា

ប្រធានាធិបតីអាមេរិកលោក ចូ បៃដិន បាននិយាយកាលពីថ្ងៃសុក្រទី៦ខែតុលាថា លោកអាចនឹងជួបជាមួយមេដឹកនាំចិន ស៊ី ជីនពីង នៅទីក្រុង San Francisco ក្នុងខែវិច្ឆិកា ខណៈរដ្ឋាភិបាលទីក្រុងវ៉ាស៊ីនតោននិងប៉េកាំង ព្យាយាមស្តារទំនាក់ទំនងឡើងវិញ។

យ៉ាងណាក្តី លោកបន្ថែមថា មិនទាន់មានការកំណត់ពេល ច្បាស់លាស់នៅឡើយទេ។

មេដឹកនាំ​នៃ​មហាអំណាចជា​គូប្រជែងទាំង២ ​មិន​បាន​ជួប​គ្នាដោយផ្ទាល់ ឬ​និយាយទល់មុខ​គ្នាអស់រយៈពេលមួយ​ឆ្នាំ​មក​ហើយ ហើយ​ភាព​តានតឹង​បាន​កើន​ឡើងខ្ពស់ ខណៈ​​ចិន និង​សហរដ្ឋ​អាមេរិក កំពុងប្រជែងគ្នាដើម្បីក្លាយខ្លួនជាប្រទេសមានឥទ្ធិពលបំផុតលើពិភពលោក។

បន្ទាប់ពីមានសេចក្តីរាយការណ៍ថា មេដឹកនាំទាំង២គ្រោងនឹងជួបគ្នា ក្នុងអំឡុងកិច្ចប្រជុំកំពូលនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅ San Francisco លោក បៃដិន បានប្រាប់អ្នកសារព័ត៌មានថា “មិនទាន់មានកិច្ចប្រជុំបែបនេះទេ ប៉ុន្តែវាគឺជាលទ្ធភាពមួយ”។

លោក បៃដិន គ្រោងនឹងធ្វើជាម្ចាស់ផ្ទះ ទទួលមេដឹកនាំមកពីទូទាំងតំបន់នៅថ្ងៃទី១៦-១៧ខែវិច្ឆិកា ក្នុងរដ្ឋកាលីហ្វ័រញ៉ា ហើយនោះជាកន្លែងដែលគេរំពឹងថា លោកបៃដិននិងលោកស៊ី ជួបគ្នា។

គួរបញ្ជាក់ថា លើកចុងក្រោយដែលលោក បៃដិន និងលោក ស៊ី ជួបគ្នា គឺក្នុងខែវិច្ឆិកាឆ្នាំ២០២២ នៅខាងក្រៅកិច្ចប្រជុំកំពូលលើកោះបាលី៕

ប្រែសម្រួល៖ Vann Vann

ប្រភព៖ CNA

ចុចអាន៖ ខែក្រោយ លោក ចូ បៃដិន នឹងបំពេញទស្សនកិច្ចនៅ វៀតណាម