ខែក្រោយ លោក ចូ បៃដិន នឹងបំពេញទស្សនកិច្ចនៅ វៀតណាម

ប្រធានាធិបតីអាមេរិកលោក ចូ បៃដិន នឹងបំពេញទស្សនកិច្ចប្រទេសវៀតណាម នៅខែក្រោយ ដើម្បីជួបជាមួយមន្ត្រីកំពូលៗ ពិភាក្សាអំពីបញ្ហានានា រាប់ចាប់ពីបច្ចេកវិទ្យា និងសេដ្ឋកិច្ច រហូតដល់ស្ថិរភាពក្នុងតំបន់ ក៏ដូចជាបម្រែបម្រួលអាកាសធាតុ ខណៈទីក្រុងវ៉ាស៊ីនតោន ព្យាយាមពង្រឹងទំនាក់ទំនងឲ្យកាន់តែជិតស្និទ្ធនៅក្នុងតំបន់​ ចំពេលប្រទេសចិន បង្កើនឥទ្ធិពលខ្លាំងឡើងៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេតវិមាននិយាយថា លោក បៃដិន នឹងជួបជាមួយអគ្គលេខាបក្សកុម្មុយនិស្តលោក Nguyen Phu Trong និងមេដឹកនាំកំពូលវៀតណាមផ្សេងទៀតក្នុងទីក្រុងហាណូយនៅថ្ងៃទី១០ ខែកញ្ញា មុនពេលវិលទៅរដ្ឋ អាឡាស្កា វិញ ដើម្បីរំលឹកខួបនៃការវាយប្រហារភេរវកម្មថ្ងៃទី១១ ខែកញ្ញា ឆ្នាំ២០០១ លើអគារពាណិជ្ជកម្មសហរដ្ឋអាមេរិក។

ទីក្រុងវ៉ាស៊ីនតោន មានបំណងធ្វើឲ្យប្រសើរឡើង នូវទំនាក់ទំនងជាមួយទីក្រុងហាណូយ ដោយចាត់ទុកវៀតណាមថាជាដៃគូដ៏សំខាន់នៅក្នុងតំបន់ ខណៈពេលទំនាក់ទំនងរបស់អាមេរិកជាមួយទីក្រុងប៉េកាំង កាន់តែតានតឹង។

ទន្ទឹមនោះ រដ្ឋបាលលោក បៃដិន បានស្វែងរកការពង្រឹងទំនាក់ទំនងរបស់សហរដ្ឋអាមេរិក នៅក្នុងតំបន់អាស៊ី ហើយលោក បៃដិន នឹងទៅដល់ប្រទេសវៀតណាម ក្រោយចាកចេញពីឥណ្ឌា ជាកន្លែងដែលលោកគ្រោងនឹងធ្វើទស្សនកិច្ចចាប់ពីថ្ងៃទី៧ ដល់ថ្ងៃទី១០ ខែកញ្ញា និងចូលរួមកិច្ចប្រជុំកំពូល G20 ។

យ៉ាងណាក្តី លោក បៃដិន នឹង​មិន​ចូល​រួម​កិច្ច​ប្រជុំ​អាស៊ាន​នៅ​ដើម​ខែ​ក្រោយ​ទេ ដោយ​បញ្ជូន​អនុប្រធានាធិបតីលោកស្រី Kamala Harris ឲ្យមកចូលរួមជំនួសវិញ៕

ប្រែសម្រួល៖ Vann Vann

ប្រភព៖ CNA

ចុចអាន៖ លោក Biden នឹងចុះហត្ថលេខាលើកិច្ចព្រមព្រៀងភាពជាដៃគូយុទ្ធសាស្ត្រ ជាមួយ វៀតណាម