ក្រុមប្រឹក្សាសន្តិសុខ​ UN សម្រេចមិនថ្កោលទោសរដ្ឋប្រហារមីយ៉ាន់ម៉ា

ក្រុមប្រឹក្សាសន្តិសុខអង្គការសហប្រជាជាតិ (UNSC) បានអំពាវនាវឲ្យមានការដោះលែងមេដឹកនាំមីយ៉ាន់ម៉ាលោកស្រី អ៊ុងសាន ស៊ូជី និងអ្នកផ្សេងទៀតដែលត្រូវបានចាប់ខ្លួនដោយយោធា ហើយបានសង្កត់ធ្ងន់លើភាពចាំបាច់ដើម្បីគាំទ្រលទ្ធិប្រជាធិបតេយ្យប៉ុន្តែមិនបានថ្កោលទោសការធ្វើរដ្ឋប្រហារនៅសប្តាហ៍នេះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

UNSC ​​ដែលមានសមាជិក១៥ប្រទេស បាននិយាយនៅក្នុងសេចក្តីថ្លែងការណ៍មួយដែលត្រូវឯកភាពដោយការមូលមតិគ្នាកាលពីថ្ងៃព្រហស្បតិ៍ថា ពួកគេសង្កត់ធ្ងន់លើភាពចាំបាច់ដើម្បីគាំទ្រស្ថាប័ននិងដំណើរការលទ្ធិប្រជាធិបតេយ្យនានា, ចៀសវាងពីអំពើហិង្សានិងការគោរពសិទ្ធិមនុស្ស សេរីភាពជាមូលដ្ឋាននិងនីតិរដ្ឋ។

ទោះបីជាយ៉ាងណាក៏ដោយ ភាសានៅក្នុងសេចក្តីថ្លែងការណ៍នេះមានភាពទន់ភ្លន់ជាងសេចក្តីព្រាងច្បាប់ដើមរបស់ចក្រភពអង់គ្លេស និងមិនបាននិយាយអំពីការធ្វើរដ្ឋប្រហារទេ។ ជាក់ស្តែង សេចក្តីថ្លែងការណ៍នេះទទួលបានការគាំទ្រពីប្រទេសចិននិងរុស្ស៊ីដែលតែងតែការពារមីយ៉ាន់ម៉ាពីសកម្មភាពសំខាន់ៗរបស់ក្រុមប្រឹក្សា។

បេសកកម្មអង្គការសហប្រជាជាតិរបស់ប្រទេសចិនបាននិយាយថា ទីក្រុងប៉េកាំងសង្ឃឹមថា សារសំខាន់ៗនៅក្នុងសេចក្តីថ្លែងការណ៍នេះ អាចត្រូវបានយកចិត្តទុកដាក់ដោយគ្រប់ភាគីទាំងអស់និងនាំទៅរកលទ្ធផលវិជ្ជមាននៅក្នុងប្រទេសមីយ៉ាន់ម៉ា។

យ៉ាងណាក្តី Reuters មិនអាចទាក់ទងរដ្ឋាភិបាលមីយ៉ាន់ម៉ាដើម្បីសុំការអត្ថាធិប្បាយបានទេ។

ម្ចាស់ជ័យលាភីពានរង្វាន់ណូបែលសន្តិភាព លោកស្រីអ៊ុងសានស៊ូជីអាយុ៧៥ឆ្នាំមិនត្រូវបានគេមើលឃើញទេចាប់តាំងពីលោកស្រីត្រូវបានចាប់ខ្លួន។ ប៉ូលិសបានប្តឹងចោទប្រកាន់លោកស្រីពីបទនាំចូលដោយខុសច្បាប់និងប្រើប្រាស់វិទ្យុទាក់ទងចំនួន៦គ្រឿងដែលត្រូវបានរកឃើញនៅក្នុងផ្ទះរបស់លោកស្រី៕

ប្រែសម្រួលដោយ៖ Vann Vann

ប្រភព៖ CNA

ចុចអាន៖ លោក ចូ បៃដិន ទាមទារឲ្យយោធាមីយ៉ាន់ម៉ា លះបង់អំណាច