អ៊ឺរ៉ុប នឹងជួបវិបត្តិ ខ្វះស្រាបៀរផឹក នាពេលអនាគត

ការឡើងកម្តៅផែនដី ត្រូវបានគេកំណត់ថា នឹងបង្កឲ្យមានកង្វះខាតស្រាបៀរ ហើយធ្វើឲ្យស្រាបៀរកាន់តែមានតម្លៃថ្លៃ និងថែមទាំងមិនសូវឆ្ងាញ់ទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការសិក្សាថ្មីមួយបានឲ្យដឹងថា បរិមាណនិងគុណភាពនៃផ្កា hop ដែលជាធាតុផ្សំដ៏សំខាន់នៅក្នុងស្រាបៀរភាគច្រើន កំពុងរងផលប៉ះពាល់ដោយបម្រែបម្រួលអាកាសធាតុ។

អ្នកស្រាវជ្រាវព្រមានថា ទិន្នផលផ្កា Hop នៅអឺរ៉ុបនឹងធ្លាក់ចុះដល់ទៅ១៨% នៅត្រឹមឆ្នាំ២០៥០ ប្រសិនបើកសិករ មិនសម្របខ្លួនទៅនឹងអាកាសធាតុក្តៅខ្លាំងទេនោះ។ ទន្ទឹមនោះ ជាតិអាស៊ីតអាល់ហ្វានៅក្នុងផ្កា hop ដែលផ្តល់ឲ្យស្រាបៀរមានរសជាតិនិងក្លិនប្លែក គឺនឹងធ្លាក់ចុះប្រហែល ៣០%។

លោក Miroslav Trnka មកពីវិទ្យាស្ថានស្រាវជ្រាវការផ្លាស់ប្តូរសកល នៃបណ្ឌិត្យសភាវិទ្យាសាស្ត្រឆេក បាននិយាយថា ច្បាស់ណាស់ ដោយសារឥទ្ធិពលនៃបម្រែបម្រួលអាកាសធាតុ អ្នកផឹកស្រាបៀរនឹងឃើញមានការផ្លាស់ប្តូរទាំងតម្លៃឬគុណភាព។ រឿងនេះ ហាក់មិនអាចចៀសរួចនោះទេ។

ការសិក្សាបានរកឃើញថា នៅអាល្លឺម៉ង់ ដែលជាប្រទេសផលិតផ្កា Hop ធំលំដាប់ទីពីររបស់ពិភពលោក, ទិន្នផលជាមធ្យមបានធ្លាក់ចុះ ១៩,១% នៅតំបន់ Spalt, ១៣,៧% នៅ Hallertau និង ៩,៥% នៅ Tettnang៕

ប្រែសម្រួល៖ Vann Vann

ប្រភព៖ Daily Star

ចុចអាន៖ ស្រាបៀរ អាចនឹងត្រូវហាមឃាត់មិនឲ្យលក់ក្នុងកីឡដ្ឋាន World Cup ទាំង ៨ ជាថ្មី