អ៊ុយក្រែន ទទួលស្គាល់ថា លោកខាងលិច កំពុងហត់នឿយជាមួយខ្លួន

រដ្ឋមន្ត្រីហិរញ្ញវត្ថុអ៊ុយក្រែន បានប្រាប់រ៉យទ័រកាលពីថ្ងៃអាទិត្យទី១៥ខែតុលាថា ការទទួលបានការគាំទ្រផ្នែកហិរញ្ញវត្ថុកាន់តែពិបាកសម្រាប់ទីក្រុងកៀវ ព្រោះអ្នកគាំទ្រលោកខាងលិចរបស់ប្រទេសនេះ បានបង្វែរការយកចិត្តទុកដាក់ទៅបញ្ហាក្នុងស្រុក និងភាពតានតឹងផ្នែកភូមិសាស្ត្រនយោបាយវិញ។

ថ្លែងនៅខាងក្រៅកិច្ចប្រជុំរបស់មូលនិធិរូបិយវត្ថុអន្តរជាតិ (IMF) និងធនាគារពិភពលោកនៅទីក្រុង Marrakech, លោក Sergey Marchenko និយាយថា ឥឡូវនេះ ទីក្រុងកៀវ ត្រូវប្រឹងប្រែងលើសមុនទ្វេដងឯណោះ ដើម្បីបញ្ចុះបញ្ចូលដៃគូរបស់ខ្លួន ឲ្យផ្តល់ការគាំទ្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយសំដៅទៅលើជម្លោះជាមួយរុស្ស៊ី, លោករដ្ឋមន្ត្រីនិយាយថា “ខ្ញុំបានមើលឃើញពីភាពហត់នឿយច្រើន ខ្ញុំឃើញភាពទន់ខ្សោយជាច្រើនក្នុងចំណោមដៃគូរបស់យើង ពួកគេចង់បំភ្លេចសង្គ្រាម ប៉ុន្តែសង្រ្គាមនៅតែបន្តកើតមានពេញបន្ទុក”។

ក្នុង​ចំណោម​កត្តា​បង្វែរ​ការ​ចាប់​អារម្មណ៍​លោក​ខាង​លិច​ពី​អ៊ុយក្រែន, មន្ត្រី​រូបនេះបានចង្អុលចំៗទៅអរិភាព​រវាង​ក្រុម​សកម្មប្រយុទ្ធ​ប៉ាឡេស្ទីន ហាម៉ាស់ ដែល​គ្រប់គ្រង​តំបន់ ហ្គាហ្សា និង​កងកម្លាំង​ការពារ​អ៊ីស្រាអែល។

មនុស្សជាច្រើនបារម្ភថា ជម្លោះនេះអាចរាលដាលដល់មជ្ឈិមបូព៌ាកាន់តែធំ ដែលរំខានដល់សេដ្ឋកិច្ចពិភពលោកទាំងមូល ដោយសារតំបន់នេះជាអ្នកផ្គត់ផ្គង់ថាមពលដ៏សំខាន់ និងជាមជ្ឈមណ្ឌលដឹកជញ្ជូនដ៏សំខាន់ទៀតផង។ លោក Marchenko ក៏​បាន​ចង្អុល​ទៅ​ការ​បោះ​ឆ្នោត​ឆ្នាំ​ក្រោយ​នៅ​អាមេរិក និង​អឺរ៉ុប​ថា​ជា​ការ​រំខាន​មួយ​ទៀតផងដែរ។

គួរបញ្ជាក់ថា បច្ចុប្បន្នទីក្រុងកៀវ ត្រូវការជំនួយផ្នែកហិរញ្ញវត្ថុរបស់លោកខាងលិច ដើម្បីគ្របដណ្តប់តម្រូវការចំណាយថវិកាច្រើនបំផុតចំនួន៤៣ពាន់លានដុល្លារក្នុងឆ្នាំ២០២៤៕

ប្រែសម្រួល៖ Vann Vann

ប្រភព៖ RT

ចុចអាន៖ លោក Zelensky កំពុងភ័យខ្លួនថា លោកខាងលិច ប្រហែលទុក អ៊ុយក្រែន ចោលហើយ ព្រោះតែជម្លោះ អ៊ីស្រាអែល-ប៉ាឡេស្ទីន