ពូទីន ទទួលយកការអញ្ជើញទៅទស្សនកិច្ចនៅ ហាណូយ ឆាប់ៗនេះ

ប្រព័ន្ធផ្សព្វផ្សាយរដ្ឋវៀតណាមបានរាយការណ៍ថា ប្រធានាធិបតីរុស្ស៊ីលោក វ្ល៉ាឌីមៀ ពូទីន បានទទួលយកការអញ្ជើញរបស់សមភាគីវៀតណាមដើម្បីបំពេញទស្សនកិច្ចនៅវៀតណាមក្នុងពេលឆាប់ៗនេះ ក្រោយពេលប្រទេសទាំងពីរបានជួបគ្នាក្រៅផ្លូវការមួយ នៅទីក្រុងប៉េកាំង ប្រទេសចិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

វៀតណាមជាប្រទេសអាស៊ីមួយដែលជាដៃគូជិតស្និទ្ធបំផុតរបស់រុស្ស៊ី ខណៈទំនាក់ទំនងជិតស្និទ្ធនេះបានចាប់ផ្ដើមតាំងសម័យសូវៀត ហើយហាណូយគឺជាអ្នកទិញអាវុធរុស្ស៊ីដ៏សំខាន់របស់រុស្ស៊ី។

ប្រធានាធិបតីវៀតណាមលោក Vo Van Thuong បានអញ្ជើញលោក ពូទីន ឱ្យឆាប់ទៅទស្សនកិច្ចប្រទេសនេះ ហើយពូទីនទទួលយកការអញ្ជើញដោយរីករាយ។ នេះបើតាមទីភ្នាក់ងារសារព័ត៌មានវៀតណាម ដែលជាបណ្តាញព័ត៌មានផ្លូវការរបស់រដ្ឋបានរាយការណ៍ កាលពីល្ងាចថ្ងៃអង្គារ ទី១៧ ខែតុលា ឆ្នាំ២០២៣។

អ្នកការទូតរុស្ស៊ីម្នាក់បាននិយាយថា មិនទាន់មានការរៀបចំច្បាស់លាស់ណាមួយកំពុងដំណើរការនៅឡើយ ដោយសារមិនទាន់មានកាលបរិច្ឆេទកំណត់សម្រាប់ដំណើរទស្សនកិច្ចដែលអាចធ្វើទៅបាន ស្របពេលនេះលោកពូទីនក៏បានអញ្ជើញលោក Thuong ទៅកាន់ទីក្រុងម៉ូស្គូផងដែរ។

យោងតាមរបាយការណ៍របស់ប្រព័ន្ធផ្សព្វផ្សាយរដ្ឋវៀតណាមបានឲ្យដឹងថា ភាគីទាំងពីរបានព្រមព្រៀងគ្នាក្នុងការពង្រឹងកិច្ចសហប្រតិបត្តិការលើវិស័យជាច្រើនរួមទាំង ពាណិជ្ជកម្ម សន្តិសុខ និងការពារជាតិ។

ការប៉ាន់ប្រមាណ បានឱ្យដឹងថា ៨០ភាគរយនៃឃ្លាំងអាវុធរបស់វៀតណាមគឺជាអាវុធ និងឧបករណ៍ដែលផ្គត់ផ្គង់ដោយទីក្រុងម៉ូស្គូ ហើយប្រទេសទាំងពីរកំពុងពិភាក្សាគ្នាអំពីកិច្ចព្រមព្រៀងអាវុធថ្មីដែលអាចកើតមាន។ យ៉ាងណាមិញ ទីក្រុងហាណូយក៏កំពុងពិភាក្សាជាមួយប្រទេសផ្សេងទៀត រួមទាំងសហរដ្ឋអាមេរិកផងដែរ ជុំវិញការផ្គត់ផ្គង់អាវុធទៅកាន់ប្រទេសរបស់ខ្លួន៕

ប្រែសម្រួល៖ សន្យា

ប្រភព៖ Reuters

ចុចអាន៖ ពូទីន ជំរុញឱ្យមានការចរចារវាងអ៊ីស្រាអែល អារ៉ាប់ និងអ៊ីរ៉ង់