លោក ចូ បៃដិន ប្រកាសការពារហ្វីលីពីន បើចិន វាយប្រហារ

កាលពីថ្ងៃពុធទី២៥ខែតុលា ប្រធានាធិបតីអាមេរិកលោក ចូ បៃដិន បានព្រមានចិនថា អាមេរិកនឹងការពារហ្វីលីពីន ក្នុងករណីមានការវាយប្រហារណាមួយ នៅសមុទ្រចិនខាងត្បូង។

ការ​ព្រមាននេះ ​កើត​ឡើង​ប៉ុន្មាន​ថ្ងៃ​ បន្ទាប់​ពី​ការ​ប៉ះ​ទង្គិច​គ្នា​រវាង​នាវា​ហ្វីលីពីន​និង​ចិន​ នៅ​ក្នុង​ដែន​ទឹក​ដែល​មាន​ជម្លោះ។ ទន្ទឹមនោះ លោក Biden បានរំលឹកឡើងវិញនូវការប្តេជ្ញាចិត្តការពាររឹងដូចដែកថែបរបស់គាត់ ចំពោះហ្វីលីពីន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីថ្លែងការណ៍របស់លោក បៃដិន ស្តីពីសមុទ្រចិនខាងត្បូងកាលពីថ្ងៃពុធ គឺជាសេចក្តីថ្លែងការណ៍ខ្លាំងបំផុតរបស់គាត់ ចាប់តាំងពីភាពតានតឹងរវាងទីក្រុងប៉េកាំង និងម៉ានីល ឡើងកម្តៅខ្លាំងក្នុងរយៈពេលប៉ុន្មានខែថ្មីៗនេះ។

ដោយចុះហត្ថលេខានៅឆ្នាំ១៩៥១ សន្ធិសញ្ញាការពារទៅវិញទៅមក បានតម្រូវឲ្យសហរដ្ឋអាមេរិកនិងហ្វីលីពីន ការពារគ្នាទៅវិញទៅមក ក្នុងករណីមានការវាយប្រហារប្រដាប់អាវុធ។

តាមការបញ្ជាក់ពីលោកបៃដិន, ការវាយប្រហារណាមួយលើយន្តហោះ នាវា ឬកងកម្លាំងប្រដាប់អាវុធហ្វីលីពីន នឹងតម្រូវឲ្យមានការប្រើប្រាស់សន្ធិសញ្ញាការពារទៅវិញទៅមកនេះ។

សូមបញ្ជាក់ កាលពីសប្តាហ៍មុន ប្រទេសហ្វីលីពីននិយាយថា សមយុទ្ធដ៏គ្រោះថ្នាក់របស់ចិន បាននាំឲ្យមានការប៉ះទង្គិចគ្នា រវាងកប៉ាល់ឆ្មាំឆ្នេរសមុទ្រចិន និងទូកផ្គត់ផ្គង់ហ្វីលីពីន នៅក្នុងតំបន់សេដ្ឋកិច្ចផ្តាច់មុខ (EEZ) របស់ហ្វីលីពីន។

នៅក្នុងឧប្បត្តិហេតុដាច់ដោយឡែកមួយទៀត ទីក្រុងម៉ានីលនិយាយថា ទូកកងជីវពលចិន បានបុកនាវាឆ្មាំឆ្នេរសមុទ្រហ្វីលីពីន៕

ប្រែសម្រួល៖ Vann Vann

ប្រភព៖ BBC

ចុចអាន៖ លោក Blinken៖ អាមេរិក មិន ចង់ ធ្វើ សង្រ្គាម ជាមួយ អ៊ីរ៉ង់ ទេ ប៉ុន្តែ នឹង ការពារ ខ្លួន