នាយកប្រតិបត្តិក្រុមហ៊ុនអចលនទ្រព្យ វៀតណាម ជាប់ពន្ធនាគារមួយជីវិត ក្រោយលក់គម្រោងខ្យល់ឲ្យអតិថិជន

នាយកប្រតិបត្តិនៃក្រុមហ៊ុន Binh Duong CityLand Real Estate Trading JSC លោក Nguyen Thanh Hung អាយុ ២៩ឆ្នាំ ត្រូវបានកាត់ទោសឲ្យជាប់ពន្ធនាគារអស់មួយជីវិតពីបទក្លែងបន្លំទ្រព្យសម្បត្តិ ដោយលក់គម្រោងខ្យល់ដល់អតិថិជនចំនួន ៣៨៤ នាក់ក្នុងតម្លៃ ៦.៦ លានដុល្លារអាមេរិក ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណែកសមាជិក ៤ នាក់ផ្សេងទៀតដែលជាបុគ្គលិក និងម្ចាស់ភាគហ៊ុននៅក្នុងក្រុមហ៊ុនដែរនោះ ត្រូវបានតុលាការផ្តន្ទាទោសឲ្យជាប់ពន្ធនាគារពី ១២ ទៅ ២០ ឆ្នាំក្នុងម្នាក់ៗ ។

យោងតាមសាលក្រមពីឆ្នាំ ២០១៨ ដល់ឆ្នាំ ២០១៩ ចុងចោទបានទិញដីកសិកម្មជាច្រើនកន្លែងនៅស្រុក Bau Bang និង Phu Giao ហើយបន្ទាប់មកបានស្នើសុំការអនុញ្ញាតសាងសង់គម្រោងលំនៅដ្ឋាន ។

ទោះបីជាពាក្យស្នើសុំមិនត្រូវបានអនុម័តក៏ដោយ ប៉ុន្តែលោក Hung និងចុងចោទនៅតែបង្កើតគម្រោងអចលនទ្រព្យចំនួន ៧ ដែលមានឈ្មោះថា Green City, Green City 2, Green City 3, Happy Home, Happy Home 2, Phuc Long City, Phu Thinh ។ បន្ទាប់មក​ក្រុមហ៊ុនបាន​ជួល​បុគ្គលិក​រាប់​រយ​នាក់​ដើម្បី​បង្កើត​ផ្នែក​លក់ស្វែងរក​អតិថិជន ។

ចំពោះអតិថិជនវិញ ខាងគម្រោងបានសន្យាថានឹងផ្ដល់វិញ្ញាបនបត្រកម្មសិទ្ធិស្របច្បាប់ បន្ទាប់ពី ៦ ខែទៅមួយឆ្នាំ ។ នៅពេលអតិថិជនមកមើលគម្រោង ក្រុមហ៊ុនបានជួលឧបករណ៍ ក៏ដូចជាគ្រឿងចក្រធ្វើសំណង់ដើម្បីឲ្យធ្វើការលើដីឡូតិ៍ដើម្បីបង្កើតចំណាប់អារម្មណ៍ និងផ្ដល់ទំនុកចិត្តដល់អតិថិជនថា គម្រោងទាំងអស់កំពុងសាងសង់ ។

គួរឲ្យដឹងថា ក្នុងរយៈពេល ២ ឆ្នាំកន្លងមកនេះ ក្រុមហ៊ុនបានលក់ផ្ទះក្នុងគម្រោងខ្យល់ដល់អតិថិជន ៣៨៤ នាក់ក្នុងតម្លៃ ១៦២ ពាន់លានដុង ឬប្រហែល ៦.៦ លានដុល្លារអាមេរិក ៕

ប្រែសម្រួល៖ នាង រតនៈ

ប្រភព៖​ VN Express