ព័ត៌មានអន្ដរជាតិ

គ្រួសារមួយនៅប៉ាណាម៉ា ខឹងយ៉ាងខ្លាំង ក្រោយបើកមឈូសចុងក្រោយ បែរមិនឃើញសពកូន

បានផុស

៣ years មុន

នៅ

ថ្ងៃព្រហស្បតិ៍ ២១ ធ្នូ ២០២៣

ដោយ

ឪពុករបស់កុមារគឺលោក Duvier Alexander Moral បាននិយាយថា កូនស្រីរបស់គាត់កើតនៅថ្ងៃទី ១០ ខែតុលានៅទីក្រុងប៉ាណាម៉ា សាធារណរដ្ឋប៉ាណាម៉ា ហើយក្រោយមកបានតែ៣ថ្ងៃប៉ុណ្ណោះ គ្រួសារក៏បានទទួលដំណឹងដ៏ក្រៀមក្រំថាទារកស្លាប់។

ទោះយ៉ាងណាក៏ដោយ ដោយសារការតវ៉ាដែលបានអូសបន្លាយអស់ជាច្រើនសប្តាហ៍ ជាលទ្ធផលផ្លូវជាច្រើនត្រូវបានបិទ។ ដូច្នេះសពទារកមិនអាចដឹកទៅស្រុកកំណើតធ្វើបុណ្យបានតាមការស្នើសុំរបស់ក្រុមគ្រួសារភ្លាមៗនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយមកនៅ ថ្ងៃទី១៤ ធ្នូ ខាងមន្ទីរពេទ្យបានបញ្ជូនសពទៅឲ្យក្រុមគ្រួសារ។ ពួកគេគ្រោងនឹងរៀបចំពិធីបុណ្យសពឲ្យបានឆាប់។ ប៉ុន្តែនៅពេលដែលម្តាយរបស់លោក Duvier បានត្រួតពិនិត្យមឈូសគាត់បានរកឃើញថា រូបរាងសពមិនដូចទារកសូម្បីតែបន្តិចណាឡើយ។ បន្ទាប់ពីពិនិត្យរួចក្រុមគ្រួសារប្រាកដណាស់ថា មឈូសនោះគ្រាន់តែជាតុក្កតា ទើបធ្វើឲ្យគ្រប់គ្នាមានអារម្មណ៍តក់ស្លុត និងមានកំហឹងលើគ្រូពេទ្យយ៉ាងខ្លាំង។

លោក Duvier និយាយ “ខាងក្រុមគ្រូពេទ្យបាននិយាយថា កូនរបស់ខ្ញុំស្លាប់បីថ្ងៃបន្ទាប់ពីកើត។ ខ្ញុំមិនយល់ពីអ្វីដែលបានកើតឡើងទេ។ តើពួកគេកំពុងលេងសើចជាមួយយើងឬ”?

ដោយឡែក លោក Carlos Ivan Gonzalez Morales ជាពូរបស់ក្មេងស្រីដែលបានស្លាប់ បាននិយាយដោយក្តីសោកស្ដាយ “ពួកយើងមានអារម្មណ៍ថា ពួកយើងត្រូវបានគេចំអកចំពោះការឈឺចាប់។ យើងកំពុងអំពាវនាវរកយុត្តិធម៌។ ហើយពិតជាចង់ស្វែងរកទារកពិតប្រាកដ”។

បន្ទាប់មក ក្រុមគ្រួសារបានសុំមើលសំបុត្រកំណើតពីមន្ទីរពេទ្យ ប៉ុន្តែរកមិនឃើញភស្តុតាងដែលបានកត់ត្រាទុកនោះទេ។ ទន្ទឹមនឹងនេះដែរ លោក Lucy Cordoba ជាមន្ត្រីការពារសិទ្ធិកុមារប្រចាំតំបន់ លោកបានស្នើឲ្យមានការស៊ើបអង្កេតឲ្យបានហ្មត់ចត់ ដើម្បីកំណត់ថា តើទារកនោះពិតជាបានស្លាប់ឬអត់៕