អាមេរិក និងអង់គ្លេស ទ្រាំលែងបានហើយ ត្រូវបង្ខំចិត្ត ប្រើធម៌ក្តៅ លើក្រុមហ៊ូធី 

សហរដ្ឋអាមេរិក និងចក្រភពអង់គ្លេសបានប្រកាសថា សម្ព័ន្ធមិត្តទាំងពីរ ទ្រាំលែងបានហើយ ពោលគឺនឹងត្រូវបង្ខំចិត្តចាត់វិធានការយោធា ទៅលើក្រុមឧទ្ទាម ហ៊ូធី របស់ប្រទេសយេម៉ែន បន្ទាប់ពីចលនានេះ បើកការវាយប្រហារទ្រង់ទ្រាយធំបំផុត មិនធ្លាប់មានពីមុនមកទៅលើកប៉ាល់ដឹកទំនិញនៅសមុទ្រក្រហម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងការវាយប្រហារកាលពីយប់ថ្ងៃអង្គារទី៩ខែមករា យន្តហោះចម្បាំងនិងនាវាពិឃាដ បានបាញ់ទម្លាក់ដ្រូន១៨គ្រឿងនិងមីស៊ីល៣គ្រាប់ ដែលបាញ់ពីសំណាក់ក្រុមគាំទ្រដោយអ៊ីរ៉ង់។

រឿងហេតុដូច្នេះ ទើបសម្ព័ន្ធមិត្តទាំង២បានព្រមានអំពីផលវិបាក ហើយនៅពេលសួរអំពីការវាយប្រហារទ្រង់ទ្រាយធំនៅក្នុងប្រទេសយេម៉ែន រដ្ឋមន្ត្រីការពារជាតិចក្រភពអង់គ្លេសលោក Grant Shapps បានឆ្លើយតបថា “យើងនឹងប្រើធម៌ក្តៅ”។

ពាក់ព័ន្ធការវាយប្រហារដដែលនោះ ក្រុម ហ៊ូធី អះអាងថា ពួកគេគឺកំណត់គោលដៅលើកប៉ាល់អាមេរិក ដែលគាំទ្រអ៊ីស្រាអែល។ ពួកគេអះអាងម្តងហើយម្តងទៀត ពួកគេកំពុងវាយប្រហារនាវាឈ្មួញដែលមានទំនាក់ទំនងជាមួយអ៊ីស្រាអែល ដើម្បីប្រឆាំងចំពោះសកម្មភាពរបស់អ៊ីស្រាអែល ខណៈសង្រ្គាមនៅហ្គាហ្សា កំពុងបន្ត។

សូមបញ្ជាក់ ការវាយប្រហារកាលពីថ្ងៃអង្គារគឺជាការវាយប្រហារលើកទី២៦ លើកប៉ាល់ពាណិជ្ជកម្មក្នុងសមុទ្រក្រហម ចាប់តាំងពីថ្ងៃទី១៩ខែវិច្ឆិកាមក។

ការវាយប្រហារកាន់តែខ្លាំងឡើងៗនេះហើយ ទើបបង្ខំឲ្យក្រុមហ៊ុនដឹកជញ្ជូនទូទាំងពិភពលោក បង្វែរកប៉ាល់ចេញពីសមុទ្រក្រហមទៅជុំវិញឆកសមុទ្រ Good Hope នៅចុងភាគខាងត្បូងនៃទ្វីបអាហ្វ្រិកវិញ។

សម្រាប់ទំនិញដែលដឹកពីអាស៊ីទៅអឺរ៉ុប ឬអាមេរិកខាងជើង, ការធ្វើដំណើរតាមផ្លូវវាងនេះ មានន័យថា ពួកគេត្រូវធ្វើដំណើរឆ្ងាយជាងមុនប្រហែល ១១១១០គីឡូម៉ែត្រទៀត ហើយអាចពន្យាពេលដឹកជញ្ជូនដល់ទៅមួយខែ ដូចនេះពិតណាស់ វាមិនអាចចៀសផុតឡើយដែលថ្លៃដឹកជញ្ជូនត្រូវអស់ច្រើនជាងមុន។

ការវាយប្រហារ បានគំរាមកំហែងយ៉ាងខ្លាំងដល់លំហូរនៃទំនិញពាណិជ្ជកម្មតាមរយៈសមុទ្រក្រហម និងព្រែកជីកស៊ុយអេ ដែលជាសរសៃឈាមដ៏សំខាន់សម្រាប់ពាណិជ្ជកម្មរវាងអាស៊ី និងបស្ចិមប្រទេស៕

ប្រែសម្រួល៖ Vann Vann

ប្រភព៖ BBC

ចុចអាន៖ អ្នកជំនាញអន្តរជាតិ ព្រមានឲ្យត្រៀមខ្លួន! តម្លៃប្រេង អាចឡើងថ្លៃមួយគុណនឹងពីរ