លោក Prabowo Subianto កំពុងដើរលើវិថីទៅកាន់តំណែងជាប្រធានាធិបតីថ្មី ឥណ្ឌូនេស៊ី

គិតត្រឹមម៉ោង ៨យប់ ម៉ោងនៅទីក្រុងហ្សាកាតា ដំណើរការរាប់សន្លឹកឆ្មោតរហ័សនៃការបោះឆ្នោតសកល នៅឥណ្ឌូណេស៊ី បានរួចរាល់ ៩០ភាគរយហើយ។ ហើយយោងតាមលទ្ធផលត្រឹមប៉ុនេះអាចឱ្យគេដឹងយ៉ាងច្បាស់ថា លោក Prabowo Subianto រដ្ឋមន្ត្រីការពារជាតិ កំពុងស្ថិតនៅលើវិថីឆ្ពោះទៅកាន់តំណែងជាប្រធានាធិបតីថ្មី ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការផ្សាយរបស់សារព័ត៌មាន Nikkei Asia នៅយប់ថ្ងៃទី១៤ ខែកុម្ភៈ នេះ បានឱ្យដឹងថា លទ្ធផល ៩០ភាគរយ នៃការរាប់សន្លឹកឆ្នោត បានបង្ហាញថា សំឡេង ៥៨% ទៅ ៥៩% បានទៅលើលោក Prabowo Subianto, ២៤% ទៅ ២៦% បានទៅលើអតីតអភិបាលក្រុងហ្សាកាតា លោក Anies Baswedan និង ១៦% ទៅ ១៧% បានទៅលើអតីតអភិបាលខេត្ត Central Java លោក Ganjar Pranowo ។

លោក Prabowo Subianto បច្ចុប្បន្នគឺជារដ្ឋមន្ត្រីក្រសួងការពារជាតិឥណ្ឌូនេស៊ី និងជាកូនប្រុសច្បងរបស់លោក Sumitro Djojohadikusumo ដែលកាន់មុខតំណែងដូចជារដ្ឋមន្ត្រីហិរញ្ញវត្ថុ និងរដ្ឋមន្ត្រីពាណិជ្ជកម្មជាបន្តបន្ទាប់ ពីទសវត្សរ៍ឆ្នាំ ១៩៥០ ដល់ឆ្នាំ ១៩៧០ ។

មកទល់ពេលនេះ ក្ដីសង្ឃឹមក្នុងតំណែងជាប្រធានាធិបតីថ្មី របស់ឥណ្ឌូនេស៊ី កាន់តែខិតមកជិតលោក Prabowo Subianto ដែលជាបេក្ខជនបន្តវេនពីអតីតប្រធានាធិបតីលោក Joko Widodo ។ សូមបញ្ជាក់ថា លោក Joko Widodo បានបញ្ចប់ការឈរឈ្មោះជាប្រធានាធិបតី ខណ:ដែលរដ្ឋធម្មនុញ្ញបានហាមប្រាមអាណត្តិទី៣ របស់លោក ៕

ប្រែសម្រួលដោយ÷ ប៉ោ កុសល