ទាហាន អាមេរិក ចាប់ផ្ដើមចេញបេសកកម្មទៅសង់កំពង់ផែនៅ ហ្គាហ្សា

នាវាកងទ័ពជើងទឹកអាមេរិកចំនួន ៤ គ្រឿងជាមួយនឹងទាហានប្រហែល ១០០ នាក់ និងដឹកឧបករណ៍ចាំបាច់សម្រាប់សាងសង់កំពង់ផែបណ្តោះអាសន្ននៅលើឆ្នេរហ្គាហ្សាសម្រាប់ការផ្តល់ជំនួយជាបន្ទាន់ បានចាកចេញពីមូលដ្ឋានមួយកន្លែងក្នុងរដ្ឋ Virginia ហើយ ។ នេះបើយោងតាមការចេញផ្សាយរបស់សារពត៌មាន CNA នៅថ្ងៃទី​១៣​​ ខែមីនា ។

ប្រធានាធិបតីអាមេរិកលោក Joe Biden បានប្រកាសផែនការសាងសង់កំពង់ផែបណ្តោះអាសន្នក្នុងអំឡុងពេលសុន្ទរកថាទៅកាន់ប្រជាជាតិកាលពីសប្តាហ៍មុន ដែលក្នុងនោះលោកប្រធានាធិបតីក៏បានប្រាប់អ៊ីស្រាអែលអនុញ្ញាតឲ្យមានជំនួយបន្ថែមទៀតចូលទៅក្នុងទឹកដីដែលកំពុងត្រូវបានឡោមព័ទ្ធដោយចង្កូមខ្លាមួយនេះ ។

កាលពីថ្ងៃអង្គារ នាវាខ្នាតយក្សពណ៌ប្រផេះដែលគេស្គាល់ថាជា នាវាដឹកជញ្ជូនជំនួយ បានធ្វើដំណើរចេញពីផែ Langley-Eustis និងអមពីក្រោយដោយនាវាតូចៗចំនួន ៣ គ្រឿងដែលគ្រោងនឹងធ្វើដំណើរប្រហែល ៣០ ថ្ងៃទៅកាន់សមុទ្រមេឌីទែរ៉ាណេខាងកើតសម្រាប់បេសកកម្មសាងសង់កំពង់ផែ ដែលជាផ្នែកមួយនៃកិច្ចខិតខំប្រឹងប្រែងរបស់សហរដ្ឋអាមេរិកក្នុងការជំរុញជំនួយមនុស្សធម៌សម្រាប់តំបន់ហ្គាហ្សា ។

មន្ត្រីអាមេរិកបាននិយាយថា កិច្ចខិតខំប្រឹងប្រែងនេះមិនពាក់ព័ន្ធនឹងសង្គ្រាមនៅក្នុងតំបន់ហ្គាហ្សានោះទេ ប៉ុន្តែទាហានអាមេរិកនឹងចូលទៅជិតតំបន់ឆ្នេរដែលរងការគំរាមគំហែង ព្រោះត្រូវបោះយុថ្កាទៅច្រាំងដើម្បីសាងសង់ផែ ទោះបីមិនទាន់មានបទឈប់បាញ់ក៏ដោយ ។

ទោះបីជាយ៉ាងណា មន្ត្រីរដ្ឋបាលជាន់ខ្ពស់របស់សហរដ្ឋអាមេរិកបានព្រមានកាលពីសប្តាហ៍មុនថា បទឈប់បាញ់ត្រូវតែមានដើម្បីដោះស្រាយតម្រូវការបន្ទាន់របស់ប្រជាជនស៊ីវិលនៅតំបន់ហ្គាហ្សា និងដើម្បីឲ្យដៃគូមនុស្សធម៌ចែកចាយជំនួយសង្គ្រោះជីវិតបានដោយសុវត្ថិភាពនៅទូទាំងតំបន់ហ្គាហ្សាតាមទំហំដែលត្រូវការ ។

គួរបញ្ជាក់ថា ចំនួនជំនួយដែលនាំចូលទៅក្នុងហ្គាហ្សាតាមឡានដឹកទំនិញបានធ្លាក់ចុះ ក្នុងអំឡុងពេល ៥ ខែនៃសង្រ្គាម ហើយតំបន់ហ្គាហ្សាកំពុងប្រឈមមុខនឹងការខ្វះខាតស្បៀងអាហារ ទឹក និងថ្នាំសង្កូវយ៉ាងធ្ងន់ធ្ងរ ខណៈសហរដ្ឋ​អាមេរិក​ក៏បានទម្លាក់ជំនួយតាម​អាកាស​ជា​បន្តបន្ទាប់​ក្នុង​ខែ​នេះផងដែរ ប៉ុន្តែ​ចំនួន​មនុស្ស​ដែល​ត្រូវ​ការ​ស្បៀងអាហារក្នុង​តំបន់ហ្គាហ្សា គឺ​មាន​ច្រើន​ជាង​ការ​ផ្តល់ជំនួយនេះទៅទៀត ៕

អត្ថបទ ៖ ប៊ុន សុភាព