ពលរដ្ឋនៅហ្គាហ្សា ២០ នាក់ស្លាប់ក្នុងការបាញ់ផ្លោង ខណៈកំពុងរង់ចាំយកស្បៀងអាហារ

យោងតាមក្រសួងសុខាភិបាលប៉ាឡេស្ទីនបានឲ្យដឹងថា យ៉ាងហោចណាស់មនុស្ស ២០ នាក់ត្រូវបានសម្លាប់ និង ១៥៥ នាក់បានរងរបួសនៅក្នុងការបាញ់ផ្លោងកាលពីថ្ងៃព្រហស្បតិ៍ ខណៈពេលដែលកំពុងរង់ចាំជំនួយស្បៀងអាហារនៅក្នុងតំបន់ហ្គាហ្សា ។ នេះបើយោងតាមការចេញផ្សាយរបស់របស់សារពត៌មាន CNN នៅថ្ងៃទី​១៥ ខែមីនានេះ ។

យោងតាមសាក្សីឃើញផ្ទាល់ភ្នែកបាននិយាយថា តំបន់នោះត្រូវបានបាញ់បោះដោយកងរថក្រោះ ហើយបណ្ដាលឲ្យនុស្សរាប់សិបនាក់បានស្លាប់ និងរបួស ខណៈពលរដ្ឋកំពុងរង់ចាំជំនួយមនុស្សធម៌ដើម្បីបំពេញការស្រេកឃ្លានរបស់ពួកគេ ។

ចំណែកក្រសួងសុខាភិបាលបាននិយាយថា ចំនួនអ្នកស្លាប់នឹងកើនឡើង ដោយសារជនរង្គ្រោះនៅតែត្រូវបានបញ្ជូនទៅកាន់មន្ទីរពេទ្យ និងអ្នកខ្លះស្លាប់នៅតាមផ្លូវ ស្របពេលមន្ទីរពេទ្យក្នុងតំបន់ក៏កំពុងខ្វះកម្លាំងពេទ្យ ក៏ដូចជាសម្ភារៈព្យាបាលជាដើម ។

ពាក់ព័ន្ធនឹងបញ្ហានេះដែរ អ្នកនាំពាក្យការិយាល័យការពារជនស៊ីវិលនៅហ្គាហ្សា លោក Mahmoud Basal បានចោទប្រកាន់អ៊ីស្រាអែលថាជាអ្នកនៅពីក្រោយការវាយប្រហារនេះ ប៉ុន្តែកងកម្លាំងការពារអ៊ីស្រាអែល (IDF) បានបដិសេធថាមិនបានធ្វើសកម្មភាពវាយប្រហារនេះនោះទេ ។

គួរបញ្ជាក់ថា ប្រជាជនប៉ាឡេស្ទីននៅតំបន់ហ្គាហ្សាបានរងទុក្ខវេទនា ដោយសារភ្លើងសង្គ្រាមជាយូរមកហើយ ហើយពេលនេះបែរជាមកត្រូវជួបគ្រោះទុរ្ភិក្សបន្ថែមទៀត ខណៈសហរដ្ឋអាមេរិក និងប្រទេសដ៏ទៃទៀតកំពុងស្វះស្វែងរកមធ្យោបាយផ្ដល់ជំនួយទាំងតាមអាកាស និងផ្លូវទឹក ៕

អត្ថបទ ៖ ប៊ុន សុភាព