ព័ត៌មានអន្ដរជាតិ

UNICEF ថា ឆ្នាំមុនជនរងគ្រោះ ដោយសារគ្រាប់មីននៅ មីយ៉ាន់ម៉ា កើនឡើងមួយគុណនឹងពីរ

បានផុស

២ years មុន

នៅ

ថ្ងៃព្រហស្បតិ៍ ៤ មេសា ២០២៤

ដោយ

ទីភ្នាក់ងារកុមាររបស់អង្គការសហប្រជាជាតិ (UNICEF) បាននិយាយកាលពីថ្ងៃព្រហស្បតិ៍ថា ចំនួនជនស៊ីវិលដែលស្លាប់បាត់បង់ជីវិត និងរងរបួស ដោយសារគ្រាប់មីន និងអាវុធជាតិផ្ទុះផ្សេងៗនៅមីយ៉ាន់ម៉ាបានកើនឡើងមួយគុណនឹងពីរដល់ ១,០៥២ នាក់កាលពីឆ្នាំមុន ស្របពេលដែលប្រទេសក៏កំពុងស្ថិតក្នុងភ្នក់ភ្លើងសង្គ្រាមស៊ីវិល ។ នេះបើយោងតាមការចេញផ្សាយដោយទីភ្នាក់ងារព័ត៌មាន Reuters នៅថ្ងៃទី៤ ខែមេសានេះ ។

UNICEF បាននិយាយទៀតថា កាលពីឆ្នាំ ២០២៣ កន្លងទៅ គ្រាប់មីន និងសំណល់ជាតិផ្ទុះសល់ពីភ្លើងសង្គ្រាមស៊ីវិលក្នុងប្រទេសមីយ៉ាន់ម៉ាបានឆក់យកជីវិតមនុស្ស និងបណ្ដាលឲ្យមានអ្នករងរបួសកើនឡើងដល់ ២៧០ ភាគរយ ក្នុងនោះកុមារមានជាង ២០ ភាគរយ ។ ចំណែកតួលេខផ្លូវការវិញមានអ្នកស្លាប់បាត់បង់ជីវិតចំនួន ១៨៨ នាក់ និង ៨៦៤ នាក់រងរបួស ខណៈកាលពីឆ្នាំ ២០២២ ជនរងគ្រោះសរុបមានត្រឹម ៣៩០ នាក់ប៉ុណ្ណោះ ។

ពាក់ព័ន្ធនឹងបញ្ហានេះដែរ លោកស្រី Debora Comini នាយកប្រចាំតំបន់អាស៊ីបូព៌ា និងប៉ាស៊ីហ្វិករបស់អង្គការ UNICEF បានលើកឡើងថា “ការប្រើប្រាស់គ្រាប់មីនមិនត្រឹមតែត្រូវដាក់ការស្ដីបន្ទោសប៉ុណ្ណោះទេ ប៉ុន្តែវាក៏ខុសច្បាប់មនុស្សធម៌អន្តរជាតិផងដែរ ស្របពេលដែលអាវុធយុទ្ធភណ្ឌទាំងនោះកំពុងត្រូវបានប្រើប្រាស់ដោយមិនរើសមុខសម្រាប់គ្រប់ភាគីទាំងអស់នៅក្នុងប្រទេសដែលកំពុងហែកហួរដោយសង្គ្រាមមួយនេះ ។

ប្រទេសមីយ៉ាន់ម៉ាបានធ្លាក់ក្នុងភាពចលាចលជាង ៣ ឆ្នាំមកហើយ ចាប់តាំងពីយោធាបានធ្វើរដ្ឋប្រហារដណ្ដើមអំណាចពីរដ្ឋាភិបាលជាប់ឆ្នោតតាមបែបប្រជាធិបតេយ្យកាលពីឆ្នាំ ២០២១ កន្លងទៅ ខណៈជម្លោះនេះទៀតសោតបានប្រែមុខមាត់មីយ៉ាន់ម៉ាឲ្យក្លាយទៅជាប្រទេសមួយក្នុងចំណោមប្រទេសដែលមានមីនច្រើនបំផុតក្នុងពិភពលោក ។

គួរបញ្ជាក់ថា យោងតាមរបាយការណ៍ពី UN មនុស្សជាង ១,៥០០ នាក់ស្លាប់បាត់បង់ជីវិត ចាប់តាំងពីរដ្ឋប្រហារយោធា និងការបង្ក្រាបដោយហិង្សាលើអ្នកគាំទ្រលទ្ធិប្រជាធិបតេយ្យក្នុងរយៈពេល ៣ ឆ្នាំមកនេះ ។ ក្នុងនោះពលរដ្ឋជាង ២.៣ លាននាក់ត្រូវបង្ខំចិត្តចាកចេញពីផ្ទះសម្បែង ខណៈជិត ២៦,000 នាក់ត្រូវចាប់ឃុំខ្លួនដោយហេតុផលនយោបាយ និងជិត ២០,០០០ នាក់រងការធ្វើទារុណកម្ម និងការរំលោភបំពាននៅក្នុងមន្ទីរឃុំឃាំង ៕