អតីតអ្នកនាំពាក្យក្រសួងការបរទេសចិន នឹងកាន់តំណែងជាឯកអគ្គរដ្ឋទូតចិ​នប្រចាំកម្ពុជា

លោក Wang Wenbin  អតីតអ្នកនាំពាក្យក្រសួងការបរទេសចិន នឹងកាន់តំណែងជាឯកអគ្គរដ្ឋទូតចិនប្រចាំកម្ពុជា។ នេះបើតាមការចេញផ្សាយរបស់ CC times  ជាភាសាចិន នៅល្ងាចថ្ងៃអង្គារ៍ នេះ។

តំណែងរបស់ លោក Wang Wenbin នៅកម្ពុជា គឺជំនួសលោក វ៉ាង វិនធាន អតីតឯកអគ្គរដ្ឋទូតចិនប្រចាំកម្ពុជា ដែលចប់អាណត្តិការងារកាលពីពេលថ្មីៗនេះ។

លោក Wang Wenbin    គឺជាមន្ត្រីដែលមានប្រជាប្រិយភាពមួយរូប ក្នុងកិច្ចការនយោបាយការបរទេស។ លោក កើត នៅឆ្នាំ១៩៧១។ អ្នកការទូតវ័យ ៥៣ឆ្នាំ រូបនេះ ធ្លាប់កាន់ការងារជាឯកអគ្គរដ្ឋទូតចិននៅប្រទេសទុយនេស៊ី ក្នុងឆ្នាំ២០១៨ ដល់ឆ្នាំ២០២០។ ក្រៅពីនេះ លោកក៏ធ្លាប់បំពេញការងារជាមន្ត្រីការទូតប្រចាំប្រទេសម៉ូរីស និងសេណេហ្គាល់ មុនក្លាយជាឯកអគ្គរដ្ឋទូតចិនប្រចាំកម្ពុជាផ្លូវការ លោកកាន់ការងារជាអ្នកនាំពាក្យក្រសួងការបរទេសចិន។

យ៉ាងណាគេ មិនទាន់ដឹងថា លោក Wang Wenbin   នឹងមកកាន់ប្រទេសកម្ពុជា ដើម្បីចូលកាន់តំណែង ក្នុងកាលបរិច្ឆេទជាក់លាក់ណាមួយនៅឡើយទេ។

គួរជម្រាបជូនបន្តិចថា ទំនាក់ទំនងរវាងកម្ពុជា និងចិន បានចាប់ផ្តើម និងចាក់ឫសយ៉ាងជ្រៅនៅក្នុងប្រវត្តិសាស្ត្រដ៏យូរលង់ មិនតិចជាងពីរសហស្សវត្សរ៍នោះទេ គិតចាប់ពីដំណើរទស្សនកិច្ចរបស់រាជទូតចិន មកកម្ពុជាលើកដំបូងក្នុងសម័យហ្វូណន៕