រលកកម្តៅខ្ពស់​​កំពុង​​វាយប្រហារវៀតណាម

ប្រទេសវៀតណាម បានប្រកាសពីការវាយប្រហារសាជាថ្មីដោយរលកកម្តៅ ខណៈខេត្តភាគច្រើននៅប៉ែកខាងជើង បានជួបសីតុណ្ហភាពឡើងខ្ពស់ដល់​កំណត់​ត្រា​ថ្មី​ ពោលគឺឈានដល់លើស ៣៥អង្សាសេទៅទៀត ហើយ​តំបន់ដែល​កម្តៅ​ឡើង​ខ្ពស់​ជាងគេគឺ Lac Son ដែល​មាន​​កម្តៅ​រហូត​ដល់​៤០អង្សាសេ និងទីក្រុងហាណូយ​មាន​​​កម្តៅ​៣៩.៣អង្សាសេ។ នេះបើតាមការចុះផ្សាយរបស់ VN Express កាលពីថ្ងៃអាទិត្យទី១១ខែសីហាឆ្នាំ២០២៤។

មជ្ឈមណ្ឌលជាតិសម្រាប់ការព្យាករធនធានជលសាស្ត្របាននិយាយថា ថ្ងៃសៅរ៍ទី១០ខែសីហាឆ្នាំ២០២៤ គឺជាថ្ងៃក្តៅបំផុត ដោយមានខេត្តរហូតដល់ទៅ២៣ក្នុងចំណោមខេត្តទាំង២៥នៅភាគខាងជើង បានជួបប្រទះកម្តៅខ្លាំង ផុត៣៥អង្សាសេ។

លើសពីនេះ ស្ថានីយចំនួន៤ក្នុងចំណោមស្ថានីយទាំង៥នៅទីក្រុងហាណូយ បានកត់ត្រាអំពីសីតុណ្ហភាពក្តៅជាង៣៨.៥អង្សាសេ ពោលក្នុងនោះគឺ Ha Dong ឡើងដល់៣៩.៣អង្សាសេ, Ba Vi ៣៩អង្សាសេ ចំណែក Lang និង Hoai Duc ឈរនៅប្រហែល៣៩អង្សាសេ។

ដោយឡែក នៅតំបន់ដីសណ្តដូចជា Hai Duong, Hung Yen, Nam Dinh, Ninh Binh និង Thai Binh សីតុណ្ហភាពខ្ពស់បំផុតគឺ ៣៨ ទៅ ៣៩អង្សាសេ។

រីឯតំបន់កណ្តាលក៏ជួបប្រទះរលកកម្តៅធ្ងន់ធ្ងរផងដែរ ដោយ Do Luong មានសីតុណ្ហភាព ៤០.១អង្សាសេ ខ្ពស់បំផុតក្នុងប្រទេស៕

អត្ថបទ៖ សុខ សុវណ្ណ

ចុចអាន៖ វៀតណាម ព្រមានឲ្យពលរដ្ឋត្រៀមខ្លួន ព្រោះថា រលកកម្តៅនឹងវាយប្រហារក្នុងសប្តាហ៍នេះ