ថៃ នៅតែបន្តគោលនយោបាយចែកលុយម្នាក់ ១ម៉ឺនបាត ទោះដូរនាយករដ្ឋមន្ត្រី

ប្រភពមួយបានប្រាប់ Bangkok Post នៅថ្ងៃព្រហស្បតិ៍ទី២២ខែសីហាឆ្នាំ២០២៤ថា គោលនយោបាយចែកលុយឌីជីថលរបស់គណបក្សភឿថៃ នឹងនៅតែដំណើរការ ប៉ុន្តែសម្រាប់ជនងាយរងគ្រោះ នឹងទទួលបានមុនគេហើយទទួលបានជាសាច់ប្រាក់តែម្តង តាមរយៈប័ណ្ណសុខុមាលភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គ្រោងការណ៍ចែកប្រាក់ ១ម៉ឺនបាត ឬគេហៅថា កាបូបឌីជីថល (Digital Wallet) បានស្ថិតនៅក្នុងមន្ទិលសង្ស័យបន្ទាប់ពីតុលាការធម្មនុញ្ញថៃ ចេញសាលក្រមដកតំណែងនាយករដ្ឋមន្ត្រីលោក សេដ្ឋា ថាវីស៊ីន ប៉ុន្តែ​យ៉ាង​ណា ប្រភពខាងលើ​បញ្ជាក់​ថា គម្រោងនេះ​នឹង​មិន​បោះ​បង់​ចោល​ឡើយ។

ផ្ទុយទៅវិញ លក្ខខណ្ឌខ្លះនឹងត្រូវកែសម្រួល ដើម្បីកំណត់គោលដៅលើជនងាយរងគ្រោះដែលបានចុះបញ្ជីក្រោមកញ្ចប់ថវិកាចំនួន ១២២ពាន់លានបាត។

យោងតាមប្រភព, ជនងាយរងគ្រោះ អាចទទួលបានសាច់ប្រាក់តែម្តងតាមរយៈប័ណ្ណសុខុមាលភាព ដែលត្រូវបានផ្តួចផ្តើមឡើងក្នុងអាណត្តិនៃរដ្ឋាភិបាលលោក ប្រាយុទ្ធ។

ជុំវិញរឿងនេះ ឧបនាយករដ្ឋមន្ត្រីចាំផ្ទះ លោក Phumtham Wechayachai បានប្រាប់ថា ព័ត៌មានលម្អិតនៃគ្រោងការណ៍នេះ នឹងត្រូវបញ្ជាក់ច្បាស់ នៅពេលគណៈរដ្ឋមន្ត្រីថ្មី ស្បថចូលកាន់តំណែង។

ដោយឡែក នាយករដ្ឋមន្ត្រីថ្មីលោកស្រី Paetongtarn Shinawatra ក៏និយាយនាពេលថ្មីៗដែរថា រដ្ឋាភិបាលនឹងមិនបោះបង់ចោលគម្រោងនេះឡើយ ប៉ុន្តែនឹងសិក្សាហើយពិចារណាជម្រើសបន្ថែមដើម្បីធានាថា គម្រោងនេះដំណើរការដោយរលូន។

សូមបញ្ជាក់ជាថ្មី ប្រជាជនថៃអាយុ១៦ឆ្នាំឡើងប្រហែល៥០លាននាក់ គឺមានសិទ្ធិទទួលបានប្រាក់ម្នាក់ ១០ ០០០បាត ក្រោមគម្រោងកាបូបលុយឌីជីថល ដែលលោក សេដ្ឋា បានសន្យា ក្នុងយុទ្ធនាការឃោសនាបោះឆ្នោតរបស់គណបក្សភឿថៃ។ យ៉ាងណា ក៏មានមតិរិះគន់មិនស្ទើរដែរ ចំពោះគម្រោងនេះ ដោយក្រុមអ្នកជំនាញមួយចំនួន បង្ហាញពីក្តីកង្វល់ថា វាច្បាស់ជាបង្កបញ្ហាប្រឈមដល់សេដ្ឋកិច្ចជាក់ជាមិនខានឡើយ៕ 

អត្ថបទ៖ សុខ សុវណ្ណ

ចុចអាន៖ យីងឡាក់ ព្រមាននិងផ្តល់ដំបូន្មាន ទៅក្មួយស្រី ដែលទើបឡើងកាន់តំណែងជានាយករដ្ឋមន្ត្រីថៃ