មិនខុសវៀតណាម ថៃត្រៀមជើងហោះហើរពិសេសយកពលរដ្ឋខ្លួនចេញពីមីយ៉ាន់ម៉ា

ស្ថានទូតថៃនៅទីក្រុងយ៉ាំងហ្គោនបានប្រកាសនៅលើផេក Facebook របស់ខ្លួនថា រដ្ឋាភិបាលបានរៀបចំជើងហោះហើរជំនួយសង្គ្រោះបន្ទាន់ពិសេសចំនួន ២ ដើម្បីនាំជនជាតិថៃដែលជាប់នៅក្នុងប្រទេសមីយ៉ាន់ម៉ាត្រឡប់មកស្រុកកំណើតវិញ ។

ការហោះហើរលើកដំបូងរបស់ក្រុមហ៊ុនអាកាសចរណ៍ Myanmar Airways International គ្រោងធ្វើឡើងនៅថ្ងៃទី ១២ ខែមីនា ។ អ្នកដែលមានចំណាប់អារម្មណ៍ត្រូវចុះឈ្មោះនៅស្ថានទូតថៃចាប់ពីថ្ងៃទី ៥ ខែមីនា ។

ជើងហោះហើរលើកទី ២ របស់ក្រុមហ៊ុនអាកាសចរណ៍ Myanmar National Airlines គ្រោងនឹងធ្វើនៅថ្ងៃទី ១៦ ខែមីនា ។ អ្នកដំណើរត្រូវចុះឈ្មោះមុនថ្ងៃទី ១៥ ខែមីនា ។

ជនជាតិថៃអាចកក់សំបុត្រយន្តហោះរបស់ពួកគេនៅស្ថានទូតដែលមានទីតាំងនៅផ្លូវ Pyay សង្កាត់ Dagon ទីក្រុងយ៉ាំងហ្គោន នៅថ្ងៃធ្វើការចាប់ពីម៉ោង ៩ ព្រឹកដល់ ១១ និង ៣០ ព្រឹក និងម៉ោង ១ និង ៣០ ល្ងាចដល់ ៥ ល្ងាច ។

ប្រភពព័ត៌មានមួយនៅក្នុងប្រទេសមីយ៉ាន់ម៉ាបានបង្ហាញថា ដោយសារភាពចលាចលផ្នែកនយោបាយនៅក្នុងប្រទេសកំពុងកើនឡើងប្រទេសខ្លះកំពុងរៀបចំជើងហោះហើរជំនួយពិសេសសម្រាប់ប្រជាជនរបស់ពួកគេចេញពីតំបន់ក្តៅ ។

ក្រសួងបាននិយាយថា “ប្រទេសវៀតណាមបានធ្វើការហោះហើរចំនួន ២ ជើងកាលពីថ្ងៃសុក្រដើម្បីដឹកជញ្ជូនជនជាតិវៀតណាមជិត ៤០០ នាក់នៅក្នុងប្រទេសមីយ៉ាន់ម៉ាត្រឡប់ទៅប្រទេសកំណើតវិញ ខណៈក្រសួងការបរទេសសិង្ហបុរីកំពុងណែនាំប្រជាជនរបស់ខ្លួនឲ្យចៀសវាងធ្វើដំណើរទៅតំបន់តវ៉ា និងចាកចេញពីប្រទេសមីយ៉ាន់ម៉ាឲ្យបានឆាប់បំផុត” ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ ជនជាតិវៀតណាមរាប់រយនាក់ ប្រញាប់ចាកចេញពីប្រទេស មីយ៉ាន់ម៉ា

ចុចអាន ៖ សិង្ហបុរីប្រាប់ពលរដ្ឋខ្លួនចាកចេញពីប្រទេសមីយ៉ាន់ម៉ាឲ្យឆាប់តាមដែលអាចធ្វើទៅបាន