ភ្លៀងធ្លាក់ខ្លាំងមិនធ្លាប់មានក្នុងមួយសតវត្សរ៍នៅកូរ៉េខាងត្បូង ប្រែក្លាយទីក្រុងទៅជាទន្លេ

ភ្លៀងធ្លាក់ខ្លាំងមិនធ្លាប់មានសោះក្នុងរយៈពេលមួយ១០០ឆ្នាំចុងក្រោយ បានវាយប្រហារភាគខាងត្បូងនិងកណ្តាលប្រទេសកូរ៉េខាងត្បូង ដោយប្រែក្លាយទីក្រុងមួយចំនួននៅទីនោះទៅជាទន្លេ ជាហេតុបង្ខំឲ្យមនុស្ស ១ ៥០០នាក់ជម្លៀសចេញពីផ្ទះសម្បែង ថែមទាំងសម្លាប់មនុស្សម្នាក់ទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

VN Express បានចុះផ្សាយកាលពីថ្ងៃអាទិត្យទី២២ខែកញ្ញាឆ្នាំ២០២៤ថា ភ្លៀងធ្លាក់ខ្លាំងរយៈពេល៣ថ្ងៃនៅទីនោះបានជន់លិចផ្លូវនិងផ្ទះប្រជាពលរដ្ឋ ជាពិសេសតំបន់ឆ្នេរសមុទ្រជាកន្លែងរងគ្រោះខ្លាំងជាងគេ។

ទន្ទឹម យោងតាមសេចក្តីប្រកាសរបស់រដ្ឋបាលឧតុនិយមកូរ៉េ, នៅតំបន់ភ្នំនៃកោះ Jeju ភ្លៀងធ្លាក់បានឈានដល់កម្រិត ៧៧០មិល្លីម៉ែត្រគិតចាប់ពីថ្ងៃទី១៩ដល់ថ្ងៃទី២១ខែកញ្ញា ចំណែកនៅទីក្រុង Yeosu ក្នុងខេត្ត Jeolla ខាងត្បូង ទឹកភ្លៀងបានឈានដល់កម្រិត៤០០មិល្លីម៉ែត្រ។ 

ចំណែកនៅ ទីក្រុង Changwon ក្នុងខេត្ត Gyeongsang ឯណោះវិញ, កាលពីថ្ងៃទី២១ខែកញ្ញាទឹកភ្លៀង បានបង្អុរមកក្នុងកម្រិត៥៣០មិល្លីម៉ែត្រ ដែលនេះជាកម្រិតភ្លៀងធ្លាក់ខ្លាំងបំផុតត្រឹមមួយថ្ងៃមិនធ្លាប់មានសោះចាប់តាំងពីដើមឆ្នាំមក។

លើសពីនេះ ការវាយប្រហារដោយភ្លៀងធ្លាក់ ​បាន​បង្ក​ការ​ខូចខាត​យ៉ាង​ធ្ងន់ធ្ងរ​ដល់សំណង់​ហេដ្ឋារចនាសម្ព័ន្ធនិង​ទ្រព្យសម្បត្តិនានា ខណៈក្រសួងមហាផ្ទៃបានចេញរបាយការណ៍ថា សំណង់ចំនួន១៦២ត្រូវខូចខាត ផ្លូវលិចទឹកចំនួន១០៧ខ្សែ បាក់ដី២១ករណី ផ្ទះ​​១៧០​ខ្នង​ត្រូវ​ទឹក​ជន់​លិច ហើយ​ដី​ស្រែ​ជាង ​៤ ១០០​ហិកតា​ត្រូវ​លិច​ទឹក​៕

អត្ថបទ៖ សុខ សុវណ្ណ

ចុចអាន៖ ប្រទេសថៃ​ នឹងមានភ្លៀងធ្លាក់ខ្លាំង រហូតដល់ឆ្នាំក្រោយ