ព័ត៌មានអន្ដរជាតិ

រុស្ស៊ី ជួយឡាវបោសសម្អាតគ្រាប់មីន ស្របពេលកំពុងដាក់ពង្រាយមីននៅអ៊ុយក្រែន

បានផុស

២ years មុន

នៅ

ថ្ងៃព្រហស្បតិ៍ ២៤ តុលា ២០២៤

ដោយ

Chheang

ខណៈពេលខ្លួនកំពុងដាក់ពង្រាយគ្រាប់មីននៅលើទឹកដីប្រទេសអ៊ុយក្រែន រុស្ស៊ីបានប្រកាសថានឹងចាត់ឲ្យអ្នកជំនាញទៅជួយដោះគ្រាប់មីននៅក្នុងប្រទេសឡាវនាខែក្រោយ។ នេះបើយោងតាមការចុះផ្សាយរបស់សារព័ត៌មាន National Interest កាលពីថ្ងៃទី២៣ខែតុលាឆ្នាំ២០២៤។

មជ្ឈមណ្ឌលសកម្មភាពកម្ចាត់មីនអន្តរជាតិរុស្ស៊ី ធ្លាប់បានបំពេញបេសកកកម្មចំនួន៦លើករួចមកហើយនៅក្នុងប្រទេសឡាវ ដោយបោសសម្អាតមីន និងយុទ្ធភណ្ឌមិនទាន់ផ្ទុះបានច្រើនជាង ៣ ៥០០គ្រាប់នៅលើផ្ទៃដីជិត ១៩០ហិកតា។ បេសកកម្មថ្មីនៅឡាវ ធ្វើឡើងតាមសេចក្ដីសម្រេចរបស់ប្រធានាធិបតីរុស្ស៊ី ហើយត្រៀមចាប់ផ្ដើមក្នុងខែវិច្ឆិកាខាងមុខ ដោយមានទាំងការបោសសម្អាតមីន និងបង្ហាត់បង្រៀនក្រុមអ្នកជំនាញ។ កន្លងមក រុស្ស៊ីអះអាងថា ខ្លួនបានហ្វឹកហាត់អ្នកជំនាញដោះមីននៅឡាវបានចំនួន ១៣៦នាក់។

គ្រាប់មីននៅឡាវ ត្រូវបានដាក់ពង្រាយកាលពីសម័យសង្គ្រាមវៀតណាមឆ្នាំ១៩៦៤-១៩៧៣ ព្រមទាំងជម្លោះរវាងកងកម្លាំងរដ្ឋាភិបាលឡាវ និងក្រុមឧទ្ទាម Hmong។

ទន្ទឹមនឹងកិច្ចខិតខំប្រឹងប្រែងជួយឡាវដោះមីន រុស្ស៊ីផ្ទុយទៅវិញបែរជាកំពុងដាក់ពង្រាយគ្រាប់មីនជាច្រើននៅលើទឹកដីអ៊ុយក្រែនដែលខ្លួនកំពុងកាន់កាប់ ខណៈភ្លើងសង្គ្រាមរយៈពេលជាង២ឆ្នាំកន្លងមកនេះនៅមិនទាន់រលត់នៅឡើយទេ។

យោងតាមរបាយការណ៍ចុងក្រោយ កងកម្លាំងរុស្ស៊ីបានដាក់ពង្រាយគ្រាប់មីន និងយុទ្ធភណ្ឌមិនទាន់ផ្ទុះគ្របដណ្ដប់លើមួយភាគបីនៃទឹកដីអ៊ុយក្រែន។

ចំណែកឯរបាយការណ៍ពីសារព័ត៌មាន The Wall Street Journal កាលពីឆ្នាំ២០២៣ បានបង្ហាញថា ប្រមាណជា៣០ភាគរយនៃផ្ទៃដីរបស់អ៊ុយក្រែន សូម្បីតែនៅជុំវិញរដ្ឋធានីកៀវ ក៏មានដាក់ពង្រាយគ្រាប់មីនផងដែរ។

មីនដែលរុស្ស៊ីប្រើនៅក្នុងសង្គ្រាមជាមួយអ៊ុយក្រែន ត្រូវគេដឹងថាជាប្រភេទមីន POM-2 និង POM-3 ហើយការដាក់ពង្រាយធ្វើឡើងតាមរយៈការទម្លាក់ដោយយន្តហោះ ឬក៏ផ្លោងចេញពីឧបករណ៍បាញ់គ្រាប់ពិសេស។ គ្រាប់មីន POM-3 របស់រុស្ស៊ីមិនធ្លាប់ត្រូវបានប្រើប្រាស់ពីមុនមកនោះទេ ពោលគឺទើបតែប្រើជាលើកដំបូងនៅលើដីអ៊ុយក្រែននេះឯង៕

ដោយ៖ ឈាង