ព័ត៌មានអន្ដរជាតិ

បំផ្ទុះភ្នំភ្លើង Laki-laki នៅឥណ្ឌូណេស៊ី សម្លាប់មនុស្ស៩នាក់

បានផុស

២ years មុន

នៅ

ថ្ងៃចន្ទ ៤ វិច្ឆិកា ២០២៤

ដោយ

Chheang

មន្ត្រីឥណ្ឌូណេស៊ី បានឲ្យដឹងនៅថ្ងៃទី៤ខែវិច្ឆិកានេះថា មនុស្សយ៉ាងហោចណាស់ ៩នាក់ បានស្លាប់ បន្ទាប់ពីកើតមានបំផ្ទុះភ្នំភ្លើង Lewotobi Laki-laki ដែលស្ថិតនៅលើកោះ Flores ក្នុងខេត្ត East Nusa Tenggara កាលពីអាធ្រាត្រថ្ងៃអាទិត្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរក្នុងតំបន់ បានជម្លៀសប្រជាជនដែលរស់នៅក្បែរនោះចេញពីកន្លែងគ្រោះថ្នាក់ ខណៈភ្នំភ្លើង Laki-laki បានព្រួសកម្អែល ផេះ និងថ្មភ្លើង។ លោក Hadi Wijaya អ្នកនាំពាក្យទីភ្នាក់ងារគ្រោះមហន្តរាយភ្នំភ្លើង និងភូមិសាស្ត្រ (PVMBG) បានប្រាប់ថា បំផ្ទុះភ្នំភ្លើងនេះ អាចស្ថិតនៅក្នុងកម្រិតទី៤ ឬខ្ពស់ជាងនេះ។ ភ្នាក់ងារជំនាញ បានណែនាំឲ្យមានការជម្លៀសខ្លួនចេញពីរង្វង់បំផ្ទុះភ្នំភ្លើងចម្ងាយ ៧គីឡូម៉ែត្រ។

លោក Hadi បានបន្ថែមថា ថ្ម និងកម្អែលភ្នំភ្លើង បានវាយប្រហារលើតំបន់ជុំវិញចម្ងាយ ៤គីឡូម៉ែត្រពីរណ្ដៅផ្ទុះ ដោយបានដុតបំផ្លាញផ្ទះសម្បែងប្រជាជន។

នៅព្រឹកថ្ងៃចន្ទ អជ្ញាធរបានបញ្ជាក់ពីការស្លាប់មនុស្ស ៩នាក់ ហើយបំផ្ទុះភ្នំភ្លើងបានប៉ះពាល់ដល់ភូមិចំនួន ៧។

សូមបញ្ជាក់ថា ឥណ្ឌូណេស៊ី គឺជាប្រទេសមួយស្ថិតនៅក្នុងតំបន់ “រង្វង់ភ្លើង” ឬហៅថា “Ring of Fire” ដែលគ្រោះរញ្ជួយដី និងបន្ទុះភ្នំភ្លើងគឺជារឿងដែលការកើតឡើងជាញឹកញាប់។ ភ្នំភ្លើងសកម្មនៅឥណ្ឌូណេស៊ី មានចំនួនសរុប ១២៧កន្លែង។

កាលពីខែឧសភាកន្លងទៅ ឥណ្ឌូណេស៊ីបានជួបប្រទះនឹងហេតុការណ៍ផ្ទុះភ្នំភ្លើងធំៗចំនួន២ គឺបន្ទុះនៅភ្នំភ្លើង Ruang ស្ថិតនៅខេត្ត North Sulawesi ដែលជម្លៀសប្រជាជនជាង ១២ ០០០នាក់ និងបន្ទុះនៅភ្នំភ្លើង Mount Marapi ស្ថិតនៅខេត្ត West Sumatra ដែលបានឆក់យកជីវិតមនុស្សយ៉ាងហោចណាស់ ៦០នាក់៕

ដោយ៖ ឈាង