រុស្ស៊ី ព្រមានឲ្យ ត្រាំ ប្រយ័ត្នត្រូវគេធ្វើឃាត រឿងដោះស្រាយជម្លោះនៅអ៊ុយក្រែន ក្រោយជាប់ឆ្នោត 

ស្របពេលការបោះឆ្នោតជ្រើសរើសប្រធានាធាបតីទី៤៧របស់សហរដ្ឋអាមេរិក កាន់តែខិតជិតមកដល់មែនទែននោះ ស្រាប់តែប្រទេសរុស្ស៊ីបានព្រមានខ្លាំងៗឲ្យលោក ដូណាល់ ត្រាំ ប្រយ័ត្នខ្លួនព្រោះថា ​បើអ្នកខាងគណបក្សសាធារណរដ្ឋឈ្នះហើយពិតជា ប៉ុនប៉ងបញ្ចប់ជម្លោះនៅអ៊ុយក្រែន ក្នុងពេលដ៏ឆាប់មែននោះ គាត់អាចត្រូវគេធ្វើឃាតដូចលោក John F. Kennedy ដែរ។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីរាយការណ៍របស់ RT កាលពីថ្ងៃអាទិត្យទី៣ខែវិច្ឆិកាឆ្នាំ២០២៤, អនុប្រធានក្រុមប្រឹក្សាសន្តិសុខរុស្ស៊ីលោក Dmitry Medvedev លើកឡើងថា បើលោកត្រាំជាប់ឆ្នោតហើយព្យាយាមបញ្ចប់ជម្លោះនៅអ៊ុយក្រែនមែន គាត់អាចនឹងត្រូវគេធ្វើឃាត ក្លាយជា John F. Kennedy ទី២ ដែលត្រូវឃាតករសម្លាប់ក្នុងឆ្នាំ១៩៦៣។

លោក Medvedev និយាយថា អំឡុងពេលឃោសនាបោះឆ្នោត លោក ត្រាំ តែងអួតអាងថានឹងបញ្ចប់សង្គ្រាមរុស្ស៊ី-អ៊ុយក្រែន ក្នុងរយៈពេលត្រឹម២៤ម៉ោង។ គាត់តែងរំពឹងទុកអំពីសន្តិភាពសម្រាប់អ៊ុយក្រែន និងទំនាក់ទំនងដ៏ល្អរបស់គាត់ជាមួយមេដឹកនាំពិភពលោក។ យ៉ាងណា បើជាប់ឆ្នោត គាត់នឹងត្រូវគេបង្ខំឲ្យគោរពតាមច្បាប់ជាប្រព័ន្ធទាំងអស់។ ដូច្នេះគាត់មិនអាចបញ្ចប់សង្គ្រាមបានឡើយ មិនមែនត្រឹមមួយថ្ងៃ បីថ្ងៃ ហើយក៏មិនមែនបីខែដែរ។ 

ស្របពេលជាមួយគ្នានោះ លោក Medvedev បញ្ជាក់ច្បាស់ៗថា ទីក្រុងមូស្គូមិនខ្វល់ទេទោះអ្នកណាឈ្នះឆ្នោតក្លាយជាប្រធានាធិបតីអាមេរិកក៏ដោយ។ សម្រាប់រុស្ស៊ី ការបោះឆ្នោតនេះមិនអាចផ្លាស់ប្តូរអ្វីបានឡើយ ព្រោះទស្សនៈរបស់បេក្ខជនទាំងពីរ សុទ្ធតែចង់ឲ្យរុស្ស៊ីចាញ់សង្គ្រាម។

សូមបញ្ជាក់ជាថ្មី ការ​បោះឆ្នោត​ប្រធានាធិបតី​សហរដ្ឋ​អាមេរិក​​​ទី​៤៧ នឹងប្រព្រឹត្តទៅ​នៅ​ថ្ងៃ​​ទី​៥​ខែ​វិច្ឆិកា ហើយព្រឹត្តិការណ៍នោះ​​នឹង​ក្លាយ​ជា​របត់​​​​​នយោបាយ​សកលលោក​ ក្នុង​ពេលដែល​សង្គ្រាម អំពើហិង្សា​នយោបាយ ​និង​ជម្លោះ​​​នានា ​កើត​​​រីករាល​ដាល​​​​ស្ទើរ​ជុំវិញ​សកល​លោក​​៕

អត្ថបទ៖ សុខ សុវណ្ណ

ចុចអាន៖ ធុងឆ្នោតនៅអាមេរិកត្រូវគេលួចដុត ឆេះខ្ទេចសន្លឹកឆ្នោតរាប់រយសន្លឹក