យន្តហោះBoeing ដឹកអ្នកដំណើរ២៤៩នាក់ ហោះបុកសត្វស្លាប បណ្តាលឲ្យឆេះម៉ាស៊ីន

យន្តហោះ Boeing 787-9 Dreamliner មួយគ្រឿងមានដឹកអ្នកដំណើរ២៤៩នាក់ បានហោះទៅបុកសត្វស្លាប បណ្តាលឲ្យឆេះម៉ាស៊ីនខាងស្តាំ ធ្វើឲ្យអ្នកដំណើរភ័យព្រលឹងចុងសក់។ នេះបើតាមការបញ្ជាក់ពីឆ្មាំសមុទ្រអ៊ីតាលី កាលពីថ្ងៃអាទិត្យទី១០ខែវិច្ឆិកាឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យន្តហោះមួយគ្រឿងនេះគឺជារបស់ក្រុមហ៊ុនចិន Hainan Airlines ហើយវាបានជួបហេតុការណ៍ក្រោយពេលចេញដំណើរពីអាកាសយានដ្ឋាន Fiumicino នៃទីក្រុងរ៉ូម ប្រទេសអ៊ីតាលី មិនបានប៉ុន្មានផង។

តាមការគ្រោងទុក យន្តហោះដឹកអ្នកដំណើរ២៤៩នាក់និងបុគ្គលិកអាកាសយានិក១៦នាក់មួយគ្រឿងនេះ នឹងត្រូវចុះចតនៅទីក្រុង Shenzhen នៃប្រទេសចិន ប៉ុន្តែដោយសារជួបឧបទ្ទវហេតុ យន្តហោះក៏បង្ហូរប្រេងចូលសមុទ្រ ហើយបកក្បាលទៅចុះចតនៅទីក្រុងរ៉ូមវិញ ដោយសុវត្ថិភាព។

ក្នុងវីដេអូដែលថតដោយអ្នកដំណើរ, គេបានមើលឃើញអណ្តាតភ្លើងឆេះចេញពីម៉ាស៊ីនខាងស្តាំ ខណៈអ្នកជិះក្នុងយន្តហោះនាំគ្នាស្រែកឆោឡោ។

សូមបញ្ជាក់ថា ករណីយន្តហោះបុកជាមួយសត្វស្លាបនេះ គឺមិនមែនជារឿងចម្លែកឡើយ ប៉ុន្តែវាកំពុងចោទជាក្តីបារម្ភយ៉ាងខ្លាំងផងដែរ ចំពោះសុវត្ថិភាពផ្លូវអាកាស៕

អត្ថបទ៖ សុខ សុវណ្ណ

ចុចអាន៖ ព្រលឹងចុងសក់! យន្តហោះដឹកមនុស្ស ១៩៧នាក់ ត្រូវភ្លើងឆេះពេលចុះចតនៅ អាមេរិក