ក្រុមអ្នកស៊ើបអង្កេតកូរ៉េខាងត្បូង ព្យាយាមចូលចាប់ខ្លួនលោក យូន ជាលើកទី២

នេះគឺជាលើកទី២ហើយ ដែលក្រុមអ្នកស៊ើបអង្កេតកូរ៉េខាងត្បូង ព្យាយាមចូលទៅចាប់ខ្លួនលោក យូន ស៊ុកយុល ក្នុងវិមានប្រធានាធិបតី បន្ទាប់ពីបរាជ័យកាលពីថ្ងៃទី៣ខែមករា ដោយសារត្រូវប្រឈមមុខជាមួយកងសន្តិសុខនិងអ្នកគាំទ្ររបស់គាត់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ BBC នៅថ្ងៃពុធទី១៥ខែមករាឆ្នាំ២០២៥, ក្នុងការប៉ុនប៉ងថ្មីនេះ ប៉ូលិសបានបន្ថែមកម្លាំងរហូតដល់ទៅ ១ ០០០នាក់ ប៉ុន្តែយ៉ាងណា មន្ត្រីមកពីការិយាល័យស៊ើបអង្កេតអំពើពុករលួយ (CIO) នៅតែជួបប្រទះនឹងចលនាតស៊ូពីសំណាក់អ្នកគាំទ្រលោក យូន រាប់ពាន់នាក់ នៅខាងក្រៅវិមានប្រធានាធិបតីដដែល។

អ្នកគាំទ្រទាំងនោះ ត្រូវបានគេឃើញលើកបដាដែលមានសរសេរពាក្យ «Stop the Steal» ហើយមានអ្នកខ្លះកាន់ទង់ជាតិកូរ៉េខាងត្បូងនិងអាមេរិក ព្រមទាំងច្រៀងចម្រៀង KPOP ទៀតផង។

ត្បិតមានការរារាំងក៏ដោយ CIO បានព្យាយាមរកច្រកផ្សេងៗដើម្បីចូលទៅក្នុងវិមានប្រធានាធិបតីឲ្យបាន សូម្បីតែទ្វារក្រោយ ហើយស្របពេលជាមួយគ្នានោះ ក៏មានសេចក្តីរាយការណ៍អំពីការប៉ះទង្គិចគ្នារវាងប៉ូលិសនិងអ្នកគាំទ្រលោក យូន ផងដែរ ដោយបណ្តាលឲ្យមនុស្សម្នាក់រងរបូស។

សូមបញ្ជាក់ជាថ្មី កាលពីថ្ងៃទី៣១​ខែធ្នូឆ្នាំ២០២៤ តុលាការកូរ៉េខាងត្បូង បានអនុម័តដីកាចាប់ខ្លួនលោក យូន ដោយអាចធ្វើឲ្យគាត់ ក្លាយជាប្រធានាធិបតីកាន់តំណែងដំបូងគេ ដែលត្រូវឃុំខ្លួន ជាផ្នែកមួយនៃការស៊ើបអង្កេតលើបទ​ចោទប្រកាន់ថា គាត់​ជា​មេខ្លោង​បះបោរ​ដោយព្យាយាមដាក់ច្បាប់អាជ្ញាសឹក។

កាលពីថ្ងៃសុក្រទី៣ខែមករាឆ្នាំ២០២៥, CIO បានប្រកាសផ្អាកប្រតិបត្តិការចាប់ខ្លួនលោក យូន នៅម៉ោង ១:៣០នាទីរសៀល (ម៉ោងនៅកូរ៉េខាងត្បូង) បន្ទាប់ពីការងាររបស់ពួកគេ ត្រូវជួបប្រទះការតស៊ូពីសំណាក់កងសន្តិសុខនិងអ្នកគាំទ្រលោក យូន ជាងមួយពាន់នាក់៕

អត្ថបទ៖ សុខ សុវណ្ណ

ចុចអាន៖ សវនាការ​​តុលាការ​ធម្មនុញ្ញ​កូរ៉េខាងត្បូង​ត្រូវ​ពន្យាពេល​ និង​បដិសេធ​​សំណើរបស់​លោក Yoon