ព័ត៌មានអន្ដរជាតិ

នាយករដ្ឋមន្ត្រីថៃប្រកាសដំណើរទស្សនកិច្ចដ៏ជោគជ័យនៅកម្ពុជា

បានផុស

១ year មុន

នៅ

ថ្ងៃសុក្រ ២៥ មេសា ២០២៥

ដោយ

ក្រោយធ្វើមាតុភូមិនិវត្តន៍ដល់ព្រះរាជាណាចក្រថៃវិញ នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត្រ (Paethongtarn Shinawatra) បានបង្ហាញពីជោគជ័យនៃដំណើរបំពេញទស្សនកិច្ចផ្លូវការនៅកម្ពុជា រយៈពេល២ថ្ងៃ គឺនៅថ្ងៃទី២៣និងទី២៤ខែមេសា ដោយភាគីទាំងពីរបានដោះស្រាយបញ្ហាឆ្លងដែនទ្វេភាគីជាច្រើន។

ព្រះមហាក្សត្រកម្ពុជាយាងសវនាការជាមួយនាយករដ្ឋមន្ត្រីថៃ ផែថងថានកាលថ្ងៃទី២៣ខែមេសា។ រូបភាព Ing Shinawatra Forever

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មានថៃ mcot បានផ្សាយនៅថ្ងៃទី២៤ខែមេសា ឆ្នាំ២០២៥ ឲ្យដឹងថា ក្រោយការវិលត្រឡប់ទៅដល់ប្រទេសថៃវិញ នាយករដ្ឋមន្ត្រីថៃ លោកស្រី ផែថងថាន ស៊ីណាវ៉ាត្រ បាននិយាយអំពីលទ្ធផលជោគជ័យក្នុងដំណើរបំពេញទស្សនកិច្ចផ្លូវការនៅព្រះរាជាណាចក្រកម្ពុជា។

ដំណើរទស្សនកិច្ចដែលធ្វើឡើងដើម្បីអបអរសាទរខួបលើកទី៧៥ នៃទំនាក់ទំនងការទូតរវាងប្រទេសថៃនិងកម្ពុជា ដោយប្រមុខដឹកនាំរាជារដ្ឋាភិបាលថៃ បានពិភាក្សាជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា អំពីកិច្ចសហប្រតិបត្តិការរវាងប្រទេសទាំងពីរ ទាំងការបង្រ្កាបឧក្រិដ្ឋកម្មតាមប្រព័ន្ធអ៊ីនធឺណិត ឧក្រិដ្ឋកម្មឆបោកតាមអនឡាញ បញ្ហាផ្សែងអ័ព្ទ (PM2.5) ឆ្លងដែន ការអភិវឌ្ឍវិស័យការងារជាដើម។ល។

សារព័ត៌មានថៃ mcot បានបន្តថា ក្នុងដំណើរបំពេញទស្សនកិច្ចនេះ នាយករដ្ឋមន្ត្រីលោកស្រី ផែថងថាន ស៊ីណាវ៉ាត្រ បានបង្ហាញមោទនភាពរំភើបរីករាយចំពោះការទទួលស្វាគមន៍យ៉ាងកក់ក្តៅពីសំណាក់រដ្ឋាភិបាលកម្ពុជា ហើយមេដឹកនាំនៃប្រទេសទាំងពីរក៏បានធ្វើជាសាក្សីក្នុងពិធីចុះហត្ថលេខាលើឯកសារចំនួន៧រួមមាន៖ កិច្ចព្រមព្រៀងស្តីពីបរិស្ថាន ការគ្រប់គ្រងបញ្ហាផ្សែងអ័ព្ទ (PM2.5) ការបង្រ្កាបឧក្រិដ្ឋកម្មតាមប្រព័ន្ធអ៊ីនធឺណិត និងឆបោកតាមអនឡាញជាដើម។ល។

លោកស្រីថា ឆ្នាំនេះគឺជាខួបលើកទី៧៥ នៃទំនាក់ទំនងការទូតរវាងប្រទេសថៃនិងកម្ពុជា ហើយប្រទេសទាំងពីរក៏បានត្រៀមខ្លួនរួចជាស្រេចក្នុងការបន្តទំនាក់ទំនងដ៏ល្អនេះតទៅមុខទៀតផងដែរ។

ទន្ទឹមគ្នានេះ នាយករដ្ឋមន្ត្រីថៃ លោកស្រី ផែថងថាន ក៏បានបញ្ជាក់ដែរថា នៅពាក់កណ្តាលឆ្នាំនេះមេដឹកនាំនៃប្រទេសទាំងពីរ (ថៃ-កម្ពុជា) នឹងធ្វើជាសហប្រធានក្នុងពិធីបើកសម្ពោធស្ពានមិត្តភាព (ថៃ-កម្ពុជា) ជាផ្លូវការដំបូងគេបង្អស់ស្ថិតនៅភូមិណងអៀន (Nong Eian) ស្រុកអារញ្ញ ខេត្តស្រះកែវ ប្រទេសថៃ ទល់មុខភូមិស្ទឹងបត់ ក្រុងប៉ោយប៉ែត ខេត្តបន្ទាយមានជ័យ ប្រទេសកម្ពុជា ហើយនឹងបើកកិច្ចប្រជុំគណៈរដ្ឋមន្ត្រីរួមគ្នាក្រៅផ្លូវការ (Joint Cabinet Retreat: JCR) នៅព្រំដែនថៃ ខេត្តស្រះកែវ ដើម្បីតាមដានវឌ្ឍនភាពនៃកិច្ចពិភាក្សារួមគ្នានេះ និងតាមដានកិច្ចសហប្រតិបត្តិការរវាងប្រទេសទាំងពីរ (ថៃ-កម្ពុជា) លើគ្រប់បញ្ហាបន្តទៀត៕

ដោយ ភ្នាក់ងារ