​​ប្រជាជនមីយ៉ាន់ម៉ាត្រូវការជំនួយមនុស្សធម៌​ចាំបាច់​កើនដល់​២២លាននាក់​ ក្រោយរញ្ជួយដី​

ប្រជាជនមីយ៉ាន់ម៉ា២លាននាក់បន្ថែមទៀត​មក​ដល់​ពេល​នេះកំពុងត្រូវការជំនួយមនុស្សធម៌​ ដែលនាំឲ្យចំនួនប្រជាជនត្រូវការជំនួយសរុបកើនដល់​២២លាននាក់ បន្ទាប់ពីការរញ្ជួយដីដ៏ខ្លាំងកាលពីថ្ងៃទី២៨ខែមីនា។ នេះបើយោងតាមការចេញផ្សាយរបស់ News Central នៅថ្ងៃទី២៩ខែមេសានេះ។

លោក Tin Aung Thein មកពីការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) ប្រចាំ​ប្រទេសមីយ៉ាន់ម៉ា បានឲ្យដឹងថា មនុស្សជាច្រើននៅតែទទួលរងពីផលប៉ះពាល់ពីការរញ្ជួយដី ទោះបីមួយខែកន្លងផុតក៏ដោយ។ នៅ​ក្នុង​ទីក្រុង Mandalay ផ្ទះ​ប្រហែល៤០០​គ្រួសារ​បាន​រង​គ្រោះ​ដោយ​ការ​រញ្ជួយ​ដី និង​ភ្លើង​ឆេះ​ក្នុង​ពេល​តែ​មួយ បណ្ដាលឲ្យមនុស្សជាច្រើនកំពុងរស់នៅក្នុងជម្រកបណ្ដោះអាសន្ននៅតាមដងផ្លូវ និងនៅទីកន្លែងសាធារណៈ។

បើតាមលោក Thein អ្នកស្ម័គ្រចិត្តក្នុងស្រុកបានផ្តល់ស្បៀងអាហារ និងការផ្គត់ផ្គង់ជាចាំបាច់ ប៉ុន្តែនៅតែមានតម្រូវការខ្លាំងចំពោះទីជម្រក អាហារ សម្ភារៈអនាម័យ និងបង្គន់អនាម័យ។ ភាគច្រើនអ្នកដែលរងផលប៉ះពាល់ ពឹងផ្អែកលើប្រាក់ឈ្នួលប្រចាំថ្ងៃនិងជំនួយពីសហគមន៍អន្តរជាតិ ដើម្បីរស់រានមានជីវិត។

មន្ត្រី OCHA ម្នាក់ទៀតក៏បានឲ្យដឹងដែរថា មីយ៉ាន់ម៉ាកំពុងប្រឈមមុខនឹងវិបត្តិធ្ងន់ធ្ងររួចទៅហើយ សូម្បីតែមុនពេលរញ្ជួយដីក៏ដោយ។ OCHA ​បាន​ព្រមាន​ថា មនុស្ស​ឥឡូវ​កាន់តែ​ប្រឈម​នឹង​ស្ថានភាព​អាក្រក់ជាងមុ​ន។

មកដល់ពេលនេះ UN និងក្រុមជំនួយបានកំពុងធ្វើការយ៉ាងជិតស្និទ្ធជាមួយអង្គការក្នុងស្រុក។ ចាប់តាំងពីការរញ្ជួយដីមក ពួកគេបានជួយមនុស្សយ៉ាងហោចណាស់ ៦០០,០០០នាក់ តាមរយៈការផ្ដល់ទឹកស្អាត និងអនាម័យ ជិតកន្លះលាននាក់ជាមួយនឹងអាហារ និងច្រើនជាង ១០០,០០០ ជាមួយនឹងការផ្គត់ផ្គង់ជាចាំបាច់មួយចំនួន។

គួរបញ្ជាក់ថា រញ្ជួយដីដ៏សាហាវកាលពីខែមុនបានបំផ្លាញភាគកណ្ដាលប្រទេសមីយ៉ាន់ម៉ាយ៉ាងធ្ងន់ធ្ងរ យោងតាម Myanma Alinn បានរាយការណ៍ថា គិតត្រឹមថ្ងៃទី ២៥ ខែមេសា ចំនួនអ្នកស្លាប់ដោយសារគ្រោះរញ្ជួយដីបានកើនឡើងដល់ ៣​៧៦៣នាក់ ខណៈមនុស្សចំនួន ៥១០៧ នាក់បានរងរបួស និង១១០ នាក់បាត់ខ្លួន។ ចំនួនអ្នកស្លាប់ និងរបួសនៅក្នុងប្រទេសមីយ៉ាន់ម៉ា ប្រែប្រួលតាមប្រភពផ្សេងៗគ្នា បើតាម Mizzima News អ្នកស្លាប់ចំនួន ៥,៣៥២នាក់ របួស ៧១០៨ នាក់ និងមនុស្សបាត់ខ្លួនចំនួន៥៣៨នាក់៕

អត្ថបទ៖ ប៊ុន សុភាព