ព័ត៌មានអន្ដរជាតិ

ណេតាន់យ៉ាហ៊ូ៖ ជ័យជម្នះលើហាម៉ាស សំខាន់ជាងការរំដោះចំណាប់ខ្មាំង

បានផុស

១ year មុន

នៅ

ថ្ងៃសុក្រ ២ ឧសភា ២០២៥

ដោយ

Chheang

យោងតាមការចុះផ្សាយរបស់ New York Post កាលពីថ្ងៃទី១ខែឧសភាឆ្នាំ២០២៥ នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានប្រកាសថា ការសម្រេចបាននូវជ័យជម្នះទាំងស្រុងលើក្រុមហាម៉ាស មានអាទិភាព និងសំខាន់ជាងការរំដោះចំណាប់ខ្មាំងដែលឃុំខ្លួននៅតំបន់ហ្គាហ្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ណេតាន់យ៉ាហ៊ូ បានសង្កត់ធ្ងន់ថា ការកម្ចាត់ក្រុមហាម៉ាសគឺជា «គោលបំណងកំពូល» របស់អ៊ីស្រាអែល ទោះបីជាគាត់បានទទួលស្គាល់សារៈសំខាន់នៃការដោះលែងចំណាប់ខ្មាំងក៏ដោយ។ មេដឹកនាំអ៊ីស្រាអែល បាននិយាយថា៖ «សង្គ្រាមនេះមានវត្ថុបំណងដ៏សំខាន់បំផុតមួយ។ ហើយវត្ថុបំណងសំខាន់បំផុតនោះគឺ ជ័យជម្នះលើ សត្រូវរបស់ពួកយើង»។

ជំហរនេះ បានទទួលរងការរិះគន់យ៉ាងខ្លាំងពីសមាគមក្រុមគ្រួសារចំណាប់ខ្មាំង ដែលទទូចថា ការជួយសង្គ្រោះគួរតែជាអាទិភាពចម្បងរបស់អ៊ីស្រាអែល។ បច្ចុប្បន្ន អ៊ីស្រាអែលជឿថា ក្នុងចំណោមចំណាប់ខ្មាំង ៥៩នាក់ មានតែ ២៤នាក់ប៉ុណ្ណោះ ដែលនៅរស់រានមានជីវិត ហើយបើតាមការលើកឡើងរបស់ភរិយាលោក ណេតាន់យ៉ាហ៊ូ គឺអ្នកស្រី Sara ចំណាប់ខ្មាំងដែលមានជីវិតអាចតិចជាង ២៤នាក់ទៅទៀត ដែលនេះផ្ទុយពីតួលេខផ្លូវការ និងបង្កឲ្យមានការព្រួយបារម្ភកាន់តែខ្លាំងក្នុងចំណោមគ្រួសារចំណាប់ខ្មាំង។

សូមបញ្ជាក់ថា កិច្ចចរចាសម្រាប់បទឈប់បាញ់ និងការដោះលែងចំណាប់ខ្មាំង បានជាប់គាំង ដោយក្រុមហាម៉ាសទាមទារឲ្យបញ្ចប់សង្គ្រាមជាអចិន្ត្រៃយ៍ ជាលក្ខខណ្ឌមួយដែលលោក ណេតាន់យ៉ាហ៊ូ បានច្រានចោល ដោយលើកហេតុផលថា វានឹងទុកឲ្យក្រុមហាម៉ាសនៅមានវត្តមានដដែល ហើយបន្តបង្កការគំរាមកំហែងដល់អ៊ីស្រាអែលនាថ្ងៃទៅមុខ៕