ឥណ្ឌា បញ្ជាឲ្យជនស៊ីវិលធ្វើលំហាត់ការពារខ្លួន ពីការវាយប្រហាររបស់ប៉ាគីស្ថាន ឲ្យហើយ

ដោយមើលឃើញសភាពការណ៍ជាមួយប៉ាគីស្ថានកាន់តែមិនស្រួលខ្លាំងហើយនោះ ឥណ្ឌា បានបញ្ជាឲ្យរដ្ឋមួយចំនួន ធ្វើលំហាត់ការពារខ្លួនក្នុងករណីមានការវាយប្រហារពីសំណាក់ទីក្រុងអ៊ីស្លាម៉ាបាដ ខណៈសមយុទ្ធបែបនេះ ត្រូវបានធ្វើឡើងចុងក្រោយបំផុតក្នុងឆ្នាំ១៩៧១ ពេលប្រទេសបង់ក្លាដែស តស៊ូទាមទារឯករាជ្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ RT, លំហាត់ស៊ីវិលនេះនឹងធ្វើឡើងនៅថ្ងៃពុធទី៧ ដោយមានការបញ្ជាផ្ទាល់ពីសំណាក់ក្រសួងមហាផ្ទៃ ហើយវារួមមានការប្រើស៊ីរ៉ែនប្រកាសអាសន្នពីការវាយប្រហារអាកាស ការបណ្តុះបណ្តាលជនស៊ីវិលនិងសិស្សនិស្សិតស្តីពីពិធីសារការពារជនស៊ីវិលនិងការអនុវត្តនីតិវិធីពេលដាច់ភ្លើងផងដែរ។

រដ្ឋទាំងនោះក៏ត្រូវបានស្នើសុំឲ្យលាក់បាំងហេដ្ឋារចនាសម្ព័ន្ធនិងទីតាំងសំខាន់ៗផងដែរ ដើម្បីយកធ្វើជាទីតាំងក្លែងបន្លំភ្នែកសត្រូវ និងត្រូវហាត់សមផែនការជម្លៀសខ្លួនសម្រាប់ការឆ្លើយតបបន្ទាន់និងជួយសង្គ្រោះឲ្យបានឆាប់រហ័សក្នុងព្រឹត្តិការណ៍មានការវាយប្រហារ។

លំហាត់ស៊ីវិលនេះកើតឡើង ក្រោយពេល ប៉ាគីស្ថាន បានគំរាមទៅឥណ្ឌាថា ខ្លួននឹងសងសឹកមួយអស់ដៃតែម្តង បើត្រូវវាយប្រហារមែន ជុំវិញភាពតានតឹងដែលកាន់តែខ្លាំងឡើង ចាប់តាំងពីហេតុការណ៍បាញ់សម្លាប់ទេសចរមួយក្រុមនៅតំបន់កាស្មៀរ។

ឯកអគ្គរដ្ឋទូតប៉ាគីស្ថានប្រចាំប្រទេសរុស្ស៊ី Muhammad Khalid Jamali បានព្រមានកាលពីចុងសប្តាហ៍ថា ចារកម្មប៉ាគីស្ថាន ពិតជាទទួលបានការណ៍សម្ងាត់ថា ឥណ្ឌាកំពុងរៀបគម្រោងវាយប្រហារខ្លួនមែន ដូច្នេះខ្លួនត្រៀមរួចជាស្រេចដើម្បីឆ្លើយតបទៅវិញមួយអស់ដៃ ក្នុងនោះរួមទាំងការប្រើអាវុធនុយក្លេអ៊ែរផងដែរ។

មិនមែនតែការវាយប្រហារដោយអាវុធទេ លោក Jamali ព្រមានថា សូម្បីតែការផ្អាកសន្តិសញ្ញាទឹក Indus រវាងប្រទេសទាំងពីរនិងការប៉ុនប៉ងដណ្តើមយកផ្នែកនៃទន្លេខាងក្រោម ក៏នឹងក្លាយជាសកម្មភាពនៃសង្រ្គាមប្រឆាំងប៉ាគីស្ថានដែរ ហើយទង្វើបែបនោះនឹងត្រូវបានឆ្លើយតបមួយអស់ដៃដូចគ្នា។

សូមជម្រាបថា ប្រទេស​ជិតខាង​អាស៊ី​ខាង​ត្បូង​ដែល​មាន​អាវុធ​នុយក្លេអ៊ែរ​ទាំងពីរនេះ បាន​ធ្វើ​សង្រ្គាម​ចំនួន​បួនលើកមកហើយ ​ចាប់តាំង​ទទួល​ឯករាជ្យ​ពី​ចក្រភព​អង់គ្លេស​ក្នុង​ឆ្នាំ១៩៤៧៕

អត្ថបទ៖ សុខ សុវណ្ណ

ចុចអាន៖ ប៉ាគីស្ថាន គំរាមសងសឹកមួយអស់ដៃ បើឥណ្ឌា ហ៊ានវាយប្រហារមែន