ណេតាន់យ៉ាហ៊ូ ប្រកាស​ថា​អត់​មាន​បទឈប់បាញ់​ទេ ទោះ​ហាម៉ាស​ដោះលែង​ចំណាប់ខ្មាំង​អាមេរិក

កាល​ពី​ថ្ងៃ​ទី​១២​ខែ​ឧសភា​ឆ្នាំ​២០២៥​ ក្រុមហាម៉ាសបានដោះលែងលោក Edan Alexander ដែលជាទាហានជនជាតិអាមេរិកដើមកំណើតអ៊ីស្រាអែលអាយុ​២១​ឆ្នាំ និងជាចំណាប់ខ្មាំងជនជាតិអាមេរិកដែល​នៅ​រស់​ចុងក្រោយគេដែលត្រូវបានឃុំខ្លួន​ក្នុង​តំបន់​ហ្គាហ្សា​អស់​រយៈពេល​១៩​ខែ។ ថ្វី​ត្បិត​មាន​ការ​ដោះលែង​នេះ​ក្ដី នាយករដ្ឋមន្ត្រី​អ៊ីស្រាអែល​​លោក បេនចាមីន ណេតាន់យ៉ាហ៊ូ បាន​សង្កត់​ធ្ងន់​ថា ពុំ​មាន​​ការ​យល់​ព្រម​លើ​បទ​ឈប់​បាញ់​​ណាមួយ​ឡើយ​ជាមួយ​ក្រុម​សកម្ម​ប្រយុទ្ធ​ប៉ាឡេស្ទីន។

លោក ណេតាន់យ៉ាហ៊ូ បានបញ្ជាក់ថា ប្រតិបត្តិការយោធានៅតំបន់ហ្គាហ្សានឹងបន្ត និង​ថែម​ទាំង​ខ្លាំង​ជាង​មុន​ទៀត ដោយអះអាងថា ការដោះលែងនេះត្រូវបានសម្រេចតាមរយៈសម្ពាធយោធា ជាជាង​ការ​សម្បទាន។

ក្រុមហាម៉ាស បាន​លើក​ឡើង​ថា ការ​ដោះលែងលោក Alexander ជាកាយវិការសុច្ឆន្ទៈមួយទៅកាន់ប្រធានាធិបតីអាមេរិកលោក ដូណាល់ ត្រាំ ដែលកំពុងបំពេញទស្សនកិច្ចក្នុងតំបន់​មជ្ឈិមបូព៌ា​​នៅ​សប្តាហ៍នេះ។

ពាក់ព័ន្ធ​នឹង​ចំណាត់ការ​នេះ លោក ដូណាល់ ត្រាំ បាន​សរសេរ​​សារ​លើ​បណ្ដាញ​សង្គម​​ថា៖ «Edan Alexander ចំណាប់ខ្មាំងជនជាតិអាមេរិក​ដែល​គេ​គិតថាស្លាប់ នឹងត្រូវបានដោះលែងដោយ​ហាម៉ាស។ នេះ​ជា​ដំណឹងដ៏អស្ចារ្យ!»។

យ៉ាង​ណាមិញ លោក ណេតាន់យ៉ាហ៊ូ បាននិយាយថា ការដោះលែង​នេះ បានកើតឡើងដោយសារតែសម្ពាធយោធារបស់អ៊ីស្រាអែលនៅក្នុងតំបន់​ហ្គាហ្សា និងសម្ពាធនយោបាយដោយលោក ត្រាំ ដោយ​បញ្ជាក់​ថា៖ «អ៊ីស្រាអែល​មិន​បាន​ប្តេជ្ញា​ចំពោះ​បទ​ឈប់​បាញ់​ណាមួយ​ឡើយ​»។

សូម​ជម្រាប​​ជា​ថ្មី​ថា ស្ថានភាពមនុស្សធម៌នៅតំបន់ហ្គាហ្សានៅតែអាក្រក់ ដោយជនជាតិប៉ាឡេស្ទីនជាង ៥២ ០០០​​នាក់​ត្រូវបាន​សម្លាប់ ចាប់តាំងពីជម្លោះចាប់ផ្តើមក្នុងខែតុលា​ឆ្នាំ​២០២៣។ អង្គការសហប្រជាជាតិ បានព្រមានអំពីស្ថានភាពទុរ្ភិក្សកាន់តែអាក្រក់ ដោយមនុស្សប្រមាណ ៥០០ ០០០​នាក់ប្រឈមនឹងហានិភ័យនៃភាពអត់ឃ្លានដោយសារតែការបិទផ្លូវ​ជំនួយ​​​ទាំង​ស្រុង​ពី​ភាគី​អ៊ីស្រាអែល​កាល​ពី​ខែ​មីនា​កន្លង​ទៅ៕

ដោយ៖ ឈាង

ចុចអាន៖ ហាម៉ាស ប្រកាស​ដោះលែង​ចំណាប់ខ្មាំង​ជនជាតិ​អាមេរិក​​តែ​ម្នាក់​គត់​​ដែល​នៅ​រស់