មេដឹកនាំ​កំពូល​អ៊ីរ៉ង់៖ «ខ្ញុំ​គិត​ថា កិច្ចចរចា​នុយក្លេអ៊ែរ​ជាមួយ​អាមេរិក​បែប​មិន​ជោគជ័យ​ទេ»

យោង​តាម​ការ​ចុះផ្សាយ​របស់​ទីភ្នាក់ងារព័ត៌មាន​ Reuters នៅថ្ងៃទី​២០​ខែឧសភា​ឆ្នាំ​២០២៥​ មេដឹកនាំកំពូលរបស់អ៊ីរ៉ង់ លោក Ayatollah Ali Khamenei បានសម្តែងការសង្ស័យទាក់ទងនឹងការចរចានុយក្លេអ៊ែរដែលកំពុងបន្តជាមួយសហរដ្ឋអាមេរិក ដោយបង្ហាញពីភាពមិនច្បាស់លាស់លើការរំពឹងទុកនៃការឈាន​ទៅ​ដល់កិច្ចព្រមព្រៀងថ្មីមួយ។

ក្នុងអំឡុងពេលសុន្ទរកថារំលឹកដល់អតីតប្រធានាធិបតី​ Ebrahim Raisi លោក Khamenei បាននិយាយថា «ខ្ញុំគិតថា កិច្ចចរចានុយក្លេអ៊ែរជាមួយសហរដ្ឋអាមេរិកនឹង​មិន​នាំមកនូវលទ្ធផលទេ»។

ការ​លើក​ឡើង​​របស់លោក Khamenei ធ្វើឡើងនៅពេលដែលទីក្រុងតេហេរ៉ង់​កំពុង​ពិចារណាលើសំណើដើម្បីផ្តួចផ្តើមការពិភាក្សានុយក្លេអ៊ែរជុំទី​៥​ជាមួយទីក្រុងវ៉ាស៊ីនតោន បន្ទាប់ពីការ​ប្រជុំ​៤​លើក​មុន​ដែលធ្វើឡើងនៅប្រទេសអូម៉ង់ និងទីក្រុងរ៉ូម។ ការអត្ថាធិប្បាយរបស់មេដឹកនាំកំពូល​អ៊ីរ៉ង់ បានឆ្លុះបញ្ចាំងពីភាពតានតឹង និងបញ្ហាប្រឈមដែលកំពុងកើតមាននៅក្នុងកិច្ចខិតខំប្រឹងប្រែងការទូតដែលមានគោលបំណងដោះស្រាយកម្មវិធីនុយក្លេអ៊ែររបស់ក្រុង​តេហេរ៉ង់។

នៅក្នុងការចរចានុយក្លេអ៊ែរលើក​ទី៤​​​​នៅទីក្រុង Muscat ប្រទេសអូម៉ង់​កាល​ពី​ថ្ងៃ​​​ទី​១១​ឧសភា​ ប្រេសិតពិសេស​អាមេរិក​លោក Steve Witkoff បានទទូចលើការបញ្ឈប់ទាំងស្រុងចំពោះការចម្រាញ់សារធាតុអ៊ុយរ៉ាញ៉ូម និងការរុះរើហេដ្ឋារចនាសម្ព័ន្ធនុយក្លេអ៊ែរសំខាន់ៗ តែ​រដ្ឋមន្ត្រីការបរទេសអ៊ីរ៉ង់​លោក Abbas Araghchi បានសង្កត់ធ្ងន់ថា អ៊ីរ៉ង់នឹងមិនបោះបង់សិទ្ធិរបស់ខ្លួនក្នុងការចម្រាញ់សារធាតុអ៊ុយរ៉ាញ៉ូមសម្រាប់គោលបំណងស៊ីវិលឡើយ ដោយបញ្ជាក់យ៉ាងច្បាស់ថា អ៊ីរ៉ង់នឹងបន្តធ្វើ​បែប​នេះ​ទៀត «ទោះ​មានឬគ្មានកិច្ចព្រមព្រៀង» ជាមួយមហាអំណាចពិភពលោក​ក៏​ដោយ។

លោក Araghchi បាននិយាយ​ថា «ប្រសិនបើសហរដ្ឋអាមេរិកចាប់អារម្មណ៍ក្នុងការធានាថាអ៊ីរ៉ង់នឹងមិនមានអាវុធនុយក្លេអែរ កិច្ចព្រមព្រៀង​គឺអាចសម្រេច​ទៅ​បាន ហើយយើងត្រៀមខ្លួនសម្រាប់ការសន្ទនាដ៏ម៉ត់ចត់​​ដើម្បីសម្រេចបាននូវដំណោះស្រាយដែលនឹងធានានូវលទ្ធផល​យូរ​អង្វែង»។ លោក​បាន​បន្ត​ថា​៖ «​ទោះ​ជា​យ៉ាង​ណា​ ការ​ចម្រាញ់​(អ៊ុយរ៉ាញ៉ូម)នៅ​ក្នុង​ប្រទេស​អ៊ីរ៉ង់​នឹង​បន្ត​ទោះ​មាន​​ឬ​​ក៏​គ្មាន​កិច្ច​ព្រម​ព្រៀង​​ក៏​ដោយ»៕

ដោយ៖ ឈាង

ចុចអាន៖ អ៊ីរ៉ង​បញ្ជាក់​ថា​នឹង​បន្ត​ចម្រាញ់​អ៊ុយរ៉ាញ៉ូម ទោះ​ធ្វើ​កិច្ចព្រមព្រៀង​ក៏​ដោយ