អាមេរិក ព្រមានឲ្យពលរដ្ឋខ្លួននៅទូទាំងពិភពលោកត្រូវប្រយ័ត្ន ក្រោយត្រាំ វាយអ៊ីរ៉ង់

ក្រសួងការបរទេសអាមេរិក បានព្រមានឲ្យពលរដ្ឋរបស់ខ្លួននៅទូទាំងពិភពលោក ត្រូវប្រុងប្រយ័ត្ន ​ចំពោះហេតុការណ៍អាក្រក់ណាមួយដែលអាចកើតឡើងលើពួកគេ ក្រោយលោក ដូណាល់ ត្រាំ វាយប្រហាររោងចក្រនុយក្លេអ៊ែររបស់អ៊ីរ៉ង់ និងចំពេលសង្គ្រាមមជ្ឈិមបូព៌ាកាន់តែធំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីណែនាំឲ្យប្រុងប្រយ័ត្នរបស់ក្រសួងកាលពីថ្ងៃអាទិត្យទី២២ខែមិថុនាឆ្នាំ២០២៥ បានឲ្យដឹងថា «ជម្លោះរវាងអ៊ីស្រាអែលនិងអ៊ីរ៉ង់ បានបណ្តាលឲ្យរំខានដល់ការធ្វើដំណើរនិងការបិទដែនអាកាសតាមកាលកំណត់នៅទូទាំងមជ្ឈិមបូព៌ា។ មានសក្តានុពលសម្រាប់បាតុកម្មប្រឆាំងពលរដ្ឋអាមេរិក និងផលប្រយោជន៍នៅបរទេស។ ដូច្នេះ ក្រសួងការបរទេសសូមផ្តល់ដំបូន្មានដល់ពលរដ្ឋអាមេរិកទូទាំងពិភពលោកឲ្យបង្កើនការប្រុងប្រយ័ត្នខ្ពស់»។

ការព្រមាននេះកើតឡើងបន្ទាប់ពីទីក្រុងនានានៅទូទាំងសហរដ្ឋអាមេរិកជាពិសេសញូវយ៉ក វ៉ាស៊ីនតោនឌី.ស៊ី និងឡូសអេនជឺឡេស បាន​ចាប់ផ្តើមបង្កើនកម្លាំងប៉ូលិសនិងប្រុងជើងការខ្ពស់ ដើម្បីទប់ទល់ការសងសឹករបស់អ៊ីរ៉ង់ ចំពេលមានក្តីបារម្ភខ្លាំងអំពីបញ្ហាសន្តិសុខ។

ប៉ូលិសក្រុងញូវយ៉ក បានបង្ហោះលើបណ្តាញសង្គម X ថា «យើងកំពុងតាមដានស្ថានការណ៍នៅអ៊ីរ៉ង់យ៉ាងយកចិត្តទុកដាក់ជាទីបំផុត។ ជាវិធានការប្រុងប្រយ័ត្ន យើងបានដាក់ពង្រាយកម្លាំងបន្ថែមនៅតាមកន្លែងសាសនា វប្បធម៌ និងការទូត ទូទាំងទីក្រុង។ យើងនឹងបន្តតាមដានសម្រាប់ផលប៉ះពាល់ដែលអាចកើតមានចំពោះញូវយ៉ក»។

ចំណែក នាយកដ្ឋាន​ប៉ូលិស​ក្រុងវ៉ាស៊ីនតោន ​ក៏​ចេញ​សេចក្តីថ្លែងការណ៍​ស្រដៀង​គ្នា​នេះ​ដែរ ដោយនិយាយថា «នាយកដ្ឋានកំពុងតាមដានយ៉ាងដិតដល់នូវព្រឹត្តិការណ៍នៅក្នុងប្រទេសអ៊ីរ៉ង់។ យើងកំពុងសហការជាមួយដៃគូអនុវត្តច្បាប់ក្នុងតំបន់ រដ្ឋ និងសហព័ន្ធ ដើម្បីចែករំលែកព័ត៌មាននិងតាមដានការណ៍សម្ងាត់ ដើម្បីជួយការពារពលរដ្ឋ អាជីវករ និងអ្នកទេសចរនៅវ៉ាស៊ីនតោន»។

រីឯនៅ Los Angeles ឯណោះ អភិបាលក្រុងឡូសអេនជឺឡេស លោកស្រី Karen Bass បានបង្ហោះសារលើបណ្តាញសង្គម X ថា ទីក្រុងកំពុងតាមដានយ៉ាងដិតដល់នូវការគំរាមកំហែងណាមួយចំពោះសុវត្ថិភាពសាធារណៈ។ យ៉ាងណា ឥឡូវមិនទាន់មានការគំរាមធ្ងន់ធ្ងរទេ ប៉ុន្តែជាការប្រុងប្រយ័ត្ន ប៉ូលិសនឹងបង្កើនការល្បាតនៅជិតទីតាំងគោរពបូជា ទីប្រមូលផ្តុំសហគមន៍ និងកន្លែងរសើបផ្សេងទៀត។

វិធានការទាំងនេះកើតឡើងស្របពេល សហរដ្ឋអាមេរិក ក៏ព្រមានឲ្យកងទ័ពរបស់ខ្លួននៅតំបន់មជ្ឈិមបូព៌ា ត្រូវត្រៀមខ្លួនទប់ទល់នឹងការសងសឹករបស់អ៊ីរ៉ង់ផងដែរ៕

អត្ថបទ៖ សុខ សុវណ្ណ

ចុចអាន៖ ទីក្រុងធំៗនៅអាមេរិក ចាប់ផ្តើមបង្កើនកម្លាំងប៉ូលិសនិងប្រុងជើងការខ្ពស់ ត្រៀមការសងសឹករបស់អ៊ីរ៉ង់