បុរស​​ចិន​ ​ជាប់គុក​ពី​បទ ​លួចដាក់សារធាតុម្យ៉ាង ចូលក្នុងភេសជ្ជៈមិត្តរួមការងារ ដើម្បីលួចរបាយការណ៍

បុគ្គលិកម្នាក់នៅក្នុងប្រទេសចិន បានធ្វើឲ្យមនុស្សជាច្រើនភ្ញាក់ផ្អើល បន្ទាប់ពីបានលួចដាក់សារធាតុ sedative ដែលត្រូវចាត់ថ្នាក់ថា ជាថ្នាំបន្សាបប្រព័ន្ធសរសៃប្រសាទដ៏មានឥទ្ធិពល ចូលទៅក្នុងភេសជ្ជៈរបស់មិត្តរួមការងារ ដើម្បីប៉ុនប៉ងលួចផែនការការងាររបស់គាត់។

គ្រោងការណ៍នេះបានចាប់ផ្តើមនៅពេលដែលបុរសម្នាក់ដែលមាននាមត្រកូល Li មកពីទីក្រុងសៀងហៃ បានរកឃើញនូវទឹកសេរ៉ូមដែលអ្នកលក់​បាន​អះអាង​ថា តែ​ប៉ុន្មាន​ដំណក់​នឹង​ធ្វើឲ្យមនុស្ស​និយាយ​ការពិត​ នេះធ្វើឲ្យលោក មានការចាប់អារម្មណ៍ និងជំរុញឲ្យគាត់សាកល្បងឥទ្ធិពលរបស់វា។

ទោះបីជាវាមិនច្បាស់ថាក្រុមហ៊ុនប្រភេទណាដែល Li ធ្វើការឲ្យ និងសារៈសំខាន់នៃផែនការការងារក៏ដោយ ទីបំផុតគាត់បានជ្រើសរើសមិត្តរួមការងាររបស់គាត់ឈ្មោះ Wang ជាប្រធានបទសាកល្បង ដោយមានបំណងទាញយកផែនការរបស់ Wang តាមរយៈសេរ៉ូមមួយនេះ។

នៅថ្ងៃទី ២៩ ខែសីហា ឆ្នាំ ២០២២ ក្នុងអំឡុងពេលអាហារពេលល្ងាចនៅស្រុក Xuhui លោក Li បានបន្ថែម សេរ៉ូមការពិត ដោយសម្ងាត់ទៅក្នុងភេសជ្ជៈរបស់ Wang ដោយលាយវាជាមួយស្រាលឿង និងស្រាបៀរ។ ជាលទ្ធផល លោក Wang បានជួបប្រទះការវិលមុខ និងផ្លាស់ប្តូរស្មារតី ដែលជំរុញឲ្យគាត់ស្វែងរកការព្យាបាលនៅថ្ងៃទី៣០ និង ៣១ ខែសីហា។

នៅថ្ងៃទី ១៣ ខែតុលា ឆ្នាំ២០២២ ក្នុងអំឡុងពេលអាហារពេលល្ងាចមួយផ្សេងទៀតនៅក្នុងស្រុក Yangpu លោក Li បានធ្វើសកម្មភាពម្តងទៀត ដោយលាយសារធាតុជាមួយស្រាបៀរម្តងទៀត។ លោក Wang វិលមុខ និងក្អួតម្តងទៀត។

ឧប្បត្តិហេតុទីបីនិងចុងក្រោយបានកើតឡើងនៅថ្ងៃទី ៦ ខែវិច្ឆិកាឆ្នាំ ២០២២ នៅពេលដែល Wang ដែលនៅតែមិនដឹងពីគ្រោះថ្នាក់បានចូលរួមជាមួយ Li សម្រាប់អាហារពេលល្ងាច។ ក្នុងពេលដែល Wang មានការរំខានមួយភ្លែត លោក Li បានឆ្លៀតឱកាសបន្ថែមសេរ៉ូមទៅក្នុងភេសជ្ជៈរបស់គាត់ ដោយក្លែងបន្លំវាជាមួយនឹងតែ chrysanthemum និងបញ្ឆោត Wang ឲ្យផឹកវា។ មួយសន្ទុះក្រោយមក ជនរងគ្រោះស្រាប់តែវិលមុខ និងបាត់បង់ស្មារតី ទើបនាំគាត់ទៅមន្ទីរពេទ្យនៅថ្ងៃបន្ទាប់។

នាពេលនោះ លោក Wang ចាប់ផ្តើមសង្ស័យ ដែលជួបប្រទះរោគសញ្ញាស្រដៀងគ្នានេះបន្ទាប់ពីអាហារពីរលើកមុនរបស់ពួកគេ។ នៅពេលពិនិត្យសុខភាព ទឹកនោម និងសំណាកសក់ គាត់បានធ្វើតេស្តវិជ្ជមានចំពោះសមាសធាតុ sedative – ជាពិសេស clonazepam និង xylazine ដែលទាំងពីរនេះគឺជាថ្នាំបញ្ចុះប្រព័ន្ធសរសៃប្រសាទកណ្តាលដ៏មានឥទ្ធិពល។

ការស៊ើបអង្កេតជាបន្តបន្ទាប់បានបង្ហាញថា សេរ៉ូមការពិត ជនសង្ស័យគ្រប់គ្រងមានផ្ទុកទាំង clonazepam និង xylazine ។ នៅពេលប្រឈមមុខនឹងអាជ្ញាធរអយ្យការសាធារណៈ ជនសង្ស័យបានសារភាពយ៉ាងពេញលេញចំពោះករណីទាំងបីនៃការគ្រប់គ្រងសេរ៉ូមការពិតដល់ជនរងគ្រោះ។

ថ្មីៗ​នេះ តុលាការ​ប្រជាជន​ស្រុក Shanghai Jing’an បាន​រក​ឃើញ​ថា Li មាន​កំហុស​ក្នុង​ការ​ប្រើ​ប្រាស់​គ្រឿង​ញៀន​តាម​រយៈ​ការ​បោក​ប្រាស់។ គាត់ត្រូវបានកាត់ទោសឲ្យជាប់ពន្ធនាគាររយៈពេល ៣ ឆ្នាំ ៣ ខែ និងពិន័យជាប្រាក់ចំនួន ១០,០០០យ័ន (១,៤០០ ដុល្លារអាមេរិក) ។

រដ្ឋអាជ្ញាបានចេញការព្រមានខ្លាំងៗទាក់ទងនឹងថ្នាំលាក់កំបាំង ដោយកត់សម្គាល់ថាសារធាតុទាំងនោះមានលក្ខណៈបោកបញ្ឆោតខ្លាំង ដែលជារឿយៗត្រូវបានក្លែងបន្លំជារបស់ប្រើប្រាស់ប្រចាំថ្ងៃ ដូចជាតែទឹកដោះគោ ស្ករគ្រាប់ នំប៊ីសស្ទីន ឬភេសជ្ជៈធម្មតា ដែលមានរូបរាង ក្លិន និងរសជាតិស្ទើរតែមិនអាចបែងចែកពីអាហារ និងភេសជ្ជៈធម្មតា៕

អត្ថបទ៖ សាង ស្រីល័ក្ខ

ចុចអាន៖បុរសចិន ​វ័យ​២៧​ឆ្នាំ​ម្នាក់ ​ដាច់​សរសៃ​ឈាម​ខួរក្បាល​ ក្រោយម៉ាស្សា​​ ក និង​ស្មា​