ព័ត៌មានអន្ដរជាតិ

ហេតុអ្វីបានជា ហ្សេលេនស្គី បញ្ជាឲ្យរុះរើរដ្ឋាភិបាលទ្រង់ទ្រាយធំ?

បានផុស

១១ ខែ មុន

នៅ

ថ្ងៃសុក្រ ១៨ កក្កដា ២០២៥

ដោយ

Chheang

ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី បានរៀបចំការរុះរើគណៈរដ្ឋមន្ត្រីដ៏ធំបំផុត ចាប់តាំងពីផ្ទុះសង្គ្រាមជាមួយរុស្ស៊ីកាលពីឆ្នាំ២០២២ ដោយដាក់លោកស្រី Yulia Svyrydenko ដែលជាអតីតរដ្ឋមន្ត្រីសេដ្ឋកិច្ច និងជាឧបនាយករដ្ឋមន្ត្រី ឲ្យក្លាយជានាយករដ្ឋមន្ត្រីថ្មី។ ចំណែកឯនាយករដ្ឋមន្ត្រីពីមុន លោក Denys Shmyhal ត្រូវបានគេរំពឹងថានឹងឡើងកាន់តំណែងជារដ្ឋមន្ត្រីការពារជាតិវិញ។ ក្រៅពីនោះ ក៏រំពឹងមានការផ្លាស់ប្ដូរតួនាទីមន្ត្រីសំខាន់ៗមួយចំនួនផ្សេងទៀត ព្រមទាំងការច្របាញ់ក្រសួងមួយចំនួនបញ្ចូលគ្នាផងដែរ។

លោក វ៉ូឡូឌីមៀរ ហ្សេលេនស្គី (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គម្រោងរុះរើគណៈរដ្ឋមន្ត្រីរបស់លោក ហ្សេលេនស្គី មានគោលបំណងធំៗដូចជា៖

១. បង្កើតកម្លាំងថ្មីទៅក្នុងភាពជាអ្នកដឹកនាំដែលធុញទ្រាន់នឹងសង្គ្រាមដ៏អូសបន្លាយ

លោក ហ្សេលេនស្គី បានពន្យល់ថា អ៊ុយក្រែនត្រូវការកម្លាំងថ្មី ដើម្បីផ្គូផ្គងសម្ពាធដែលកំពុងកើនឡើងក្នុងសម័យសង្គ្រាម។ លោកបានពណ៌នាអំពីការរុះរើនេះថាមានសារៈសំខាន់ក្នុងការពង្រឹងអភិបាលកិច្ចឡើងវិញ និងធានាឲ្យក្រសួងនានាសម្រេចបាននូវគោលដៅជាយុទ្ធសាស្ត្រ ខណៈពេលជម្លោះនៅតែបន្តអូសបន្លាយរយៈពេលវែង។

២. ផ្តោតលើការការពារ និងសេដ្ឋកិច្ច

គម្រោងស្នូលនៃការរុះរើនេះ គឺការបង្កើនល្បឿនផលិតកម្មអាវុធក្នុងស្រុក ដែលបច្ចុប្បន្នមានត្រឹម ៤០% នៃសព្វាវុធដែលអ៊ុយក្រែនប្រើទៅច្បាំងលើសមរភូមិ។ លោក ហ្សេលេនស្គី បានកំណត់គោលដៅប្រកបដោយមហិច្ឆិតា គឺបង្កើនឲ្យបានដល់ ៥០% ក្នុងរយៈពេល៦ខែខាងមុខ។ គណៈរដ្ឋមន្ត្រីថ្មី មានភារកិច្ចយ៉ាងច្បាស់លាស់ក្នុងការពង្រឹងបទប្បញ្ញត្តិ ការពង្រឹងសម្ព័ន្ធភាពសេដ្ឋកិច្ច និងការដាក់ទោសលើអ្នកណាដែលធ្វើឲ្យប៉ះពាល់ដល់ការងើបឡើងវិញរបស់ជាតិ។

៣. ពង្រឹងភាពជាដៃគូជាមួយលោកខាងលិច

ការតែងតាំងលោកស្រី Svyrydenko ដែលជាតួអង្គសំខាន់ និងមានទំនាក់ទំនងល្អជាមួយសហរដ្ឋអាមេរិក អាចបង្កើតជាសារមួយឆ្លើយតប និងបង្កើនទំនុកចិត្តសម្រាប់សម្ព័ន្ធមិត្តលោកខាងលិចរបស់អ៊ុយក្រែន។ លោកស្រី Svyrydenko បានដឹកនាំកិច្ចព្រមព្រៀងរ៉ែសំខាន់ៗជាមួយរតនាគារសហរដ្ឋអាមេរិក កាលពីខែមេសា ដែលជាគំនិតផ្តួចផ្តើមមួយដ៏មានសារៈសំខាន់ខ្លាំង ក្នុងការស្ដារសេដ្ឋកិច្ចអ៊ុយក្រែន ជាពិសេសគឺការកសាងឡើងវិញក្រោយសង្គ្រាម។

៤. បង្កើនប្រសិទ្ធភាព

ជាច្រើនឆ្នាំក្នុងអំឡុងពេលសង្គ្រាមដែលកំពុងបន្តនេះ មុខតំណែងជាច្រើន ត្រូវបានទុកឲ្យនៅទំនេរ ឬកាន់កាប់ដោយមន្ត្រីក្រៅផ្លូវការ ឬ «ស្តីទី» ដែលរារាំងដល់អភិបាលកិច្ចដែលមានប្រសិទ្ធភាព។ ការរុះរើនេះ មានបំណងដោះស្រាយនូវរាល់បញ្ហាទាំងនេះ ដោយនឹងមានការតែងតាំងមន្ត្រីជាផ្លូវការ និងពេញម៉ោងទៅលើតួនាទីដែលនៅទំនេរ។

៥. ស្តារទំនុកចិត្តសាធារណៈឡើងវិញ

ការស្ទង់មតិសាធារណៈ បង្ហាញថា ការគាំទ្រលោក ហ្សេលេនស្គី មានការធ្លាក់ចុះយ៉ាងគំហុកក្នុងរយៈពេលប៉ុន្មានខែថ្មីៗកន្លងទៅ។ ការរុះរើនេះ ទំនងជាអាចស្ដារឡើងវិញនូវទំនុកចិត្តពីសាធារណៈ ពាក់ព័ន្ធនឹងបញ្ហាអំពើពុករលួយ និងដំណោះស្រាយបញ្ហាក្នុងស្រុកឲ្យមានប្រសិទ្ធភាពជាងមុន៕

ដោយ៖ ឈាង

ព័ត៌មានអន្ដរជាតិ១ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា