ព័ត៌មានអន្ដរជាតិ

រលកយក្សស៊ូណាមិនៅជប៉ុន ហក់ឡើងដល់កម្ពស់ ១,៣ម៉ែត្រ

បានផុស

៩ ខែ មុន

នៅ

ថ្ងៃពុធ ៣០ កក្កដា ២០២៥

ដោយ

Chheang

យោងតាមការចុះផ្សាយរបស់សារព័ត៌មាន NHK World នៅថ្ងៃទី៣០កក្កដានេះ រលកយក្សស៊ូណាមិ បានហក់ឡើងដល់កម្ពស់ ១,៣ម៉ែត្រហើយនៅកំពង់ផែ Kuji ភាគឦសានប្រទេសជប៉ុន។ រលកយក្សស៊ូណាមិនេះ កើតឡើងបន្ទាប់ពីគ្រោះរញ្ជួយដីកម្រិតធ្ងន់៨,៨រ៉ិចទ័រ បានវាយប្រហារតំបន់ចុងបូព៌ានៃប្រទេសរុស្ស៊ី។

រលកយក្សស៊ូណាមិនៅរុស្ស៊ីថ្ងៃទី៣០កក្កដា២០២៥ (រូបថត៖ Reuters)

រលកក៏បានកើនឡើងកម្ពស់ដល់ ៨០សង់ទីម៉ែត្រនៅទីក្រុង Nemuro Hanasaki និង ៧០សង់ទីម៉ែត្រនៅកំពង់ផែ Ishinomaki។ កម្ពស់រលក កំពុងកើនឡើងជាលំដាប់នៅកន្លែងផ្សេងទៀតក្នុងប្រទេសជប៉ុនពីកម្ពស់ ៥០ ដល់ ៦០សង់ទីម៉ែត្រ កើនឡើងពី ២០សង់ទីម៉ែត្រកាលពីព្រឹកមិញ។

អាជ្ញាធរជប៉ុន និយាយថា រលកអាចឡើងដល់កម្ពស់ ៣ម៉ែត្រ ហើយបានព្រមានអ្នកស្រុកថា ការព្រមានអំពីរលកយក្សស៊ូណាមិអាចនឹងស្ថិតនៅក្នុងរយៈពេល ២៤ម៉ោងបន្ទាប់។

ចំណែកឯសារព័ត៌មាន Al Jazeera បានរាយការណ៍ថា រលកយក្សស៊ូណាមិ ក៏ត្រូវបានរកសង្កេតឃើញនៅឆ្នេរសមុទ្រប៉ាស៊ីហ្វិក នៃរដ្ឋអាឡាស្កា សហរដ្ឋអាមេរិកផងដែរ។ ដោយឡែក CNN បានផ្សាយថា រលកយក្សស៊ូណាមិ មានកម្ពស់ហក់ឡើងដល់ ១,៥ម៉ែត្រហើយនៅកោះ Island ខណៈការប៉ាន់ប្រមាណថា វានឹងអាចឡើងដល់ ៣ម៉ែត្រឯណោះក្នុងរយៈពេលប៉ុន្មានម៉ោងខាងមុខ។

សូមជម្រាបថា តាមសេចក្តីរាយការណ៍របស់ RT នៅថ្ងៃពុធទី៣០ខែកក្កដាឆ្នាំ២០២៥, ការរញ្ជួយដីនេះកើតឡើងនៅឧបទ្វីប Kamchatka នាវេលាម៉ោង១១:៣០នាទីព្រឹក (ម៉ោងនៅរុស្ស៊ី) មានជម្រៅ១៩គីឡូម៉ែត្រ ជាមួយចំណុចកណ្តាលនៅចម្ងាយ១៣៦គីឡូម៉ែត្រពីតំបន់ Petropavlovsk-Kamchatsky។

ការរញ្ជួយដីនេះមានកម្លាំងខ្លាំងណាស់ ដោយនៅរុស្ស៊ី មានកើតរលកយក្សស៊ូណាមិរួចទៅហើយ ប៉ុន្តែភ្លាមៗមិនទាន់មានការបញ្ចេញទិន្នន័យអំពីការខូចខាតនិងជនរងគ្រោះនៅឡើយទេ។

ពាក់ព័ន្ធនឹងរលកយក្សស៊ូណាមិនេះ ក្រសួងការងារកម្ពុជា ក៏បានប្រកាសឲ្យពលរដ្ឋខ្មែរដែលកំពុងស្នាក់នៅ និងធ្វើការនៅជប៉ុន ត្រូវមានការប្រុងប្រយ័ត្នខ្ពស់ និងបន្តយកចិត្តទុកដាក់តាមដានស្ថានការណ៍ ព្រមទាំងអនុវត្តតាមការណែនាំរបស់អាជ្ញាធរជប៉ុន៕

ដោយ៖ ឈាង

ចុចអាន៖ រញ្ជួយដីកម្រិតធ្ងន់៨.៧រ៉ិចទ័រ វាយប្រហាររុស្ស៊ី ទាញសញ្ញាព្រមានរលកយក្សស៊ូណាមិ ដល់ជប៉ុននិងអាមេរិក