ដាច់ខ្សែស្ពានយោលនៅតំបន់ Xinjiang ប្រទេសចិនសម្លាប់មនុស្ស៥នាក់

យោងតាមការចេញផ្សាយរបស់ទីភ្នាក់ងារព័ត៌មាន​ Reuters មនុស្ស ៥ នាក់បានស្លាប់និង ២៤ នាក់បានរងរបួសកាលពីល្ងាចថ្ងៃពុធ ក្នុងហេតុការណ៍ខ្សែស្ពានយោលមួយដាច់នាំឲ្យស្ពានបាក់ទៅម្ខាងធ្លាក់មនុស្សចុះក្រោមក្នុងតំបន់ Xinjiang ភាគពាយ័ព្យនៃប្រទេសចិន។

ហេតុការណ៍ដ៏រន្ធត់នេះបានកើតឡើងនៅ Xiata ជាតំបន់ទេសចរណ៍មួយក្នុងខេត្តស្វយ័ត Ili Kazakh ដែលមានទេសភាពធម្មជាតិ រួមទាំងផ្លូវភ្នំ ជ្រលងភ្នំ និងទន្លេ ព្រមទាំងសំណល់វប្បធម៌ ដូចជាប្រាសាទបុរាណនៃទីក្រុងបុរាណ។ បើតាមវីដេអូដែលបង្ហាញដោយ Reuters ឃើញថាស្ពានរងការខូចខាតនិងផ្អៀងទៅម្ខាង ខណៈកំពុងមានកិច្ទខិតខំប្រឹងប្រែងជួយសង្គ្រោះមនុស្សដែលធ្លាក់ចុះមកក្រោមនិងអ្នកដែលជាប់នៅខាងលើស្ពាន។

តំបន់ទេសចរណ៍ខាងលើត្រូវបានបិទ ដើម្បីធ្វើការស៊ើបអង្កេត។ រដ្ឋាភិបាល​​​ចិនក៏​បាន​បញ្ជូន​ក្រុម​មួយ​ទៅ​ជួយ​ក្នុង​ការ​ជួយ​សង្គ្រោះ និង​ស្វែង​រកមូលហេតុដែលនាំឲ្យមានហេតុការណ៍ដ៏រន្ធត់នេះកើតឡើង៕

អត្ថបទ៖ ប៊ុន សុភាព