ព័ត៌មានអន្ដរជាតិ

ថៃធ្វើរឿងដ៏អាម៉ាស់ ហ៊ានបដិសេធការដាក់ពង្រាយអ្នកអង្កេតការណ៍អន្តរជាតិ

បានផុស

៨ ខែ មុន

នៅ

ថ្ងៃព្រហស្បតិ៍ ២១ សីហា ២០២៥

ដោយ

ខណៈពេលដែលប្រព័ន្ធផ្សព្វផ្សាយរបស់ប្រទេសថៃបង្កើនការផ្សព្វផ្សាយព័ត៌មានអំពីការបង្កហេតុរបស់យោធាថៃនៅតាមបណ្តោយព្រំដែនកម្ពុជា នាយករដ្ឋមន្ត្រីស្តីទីថៃ លោក Phumtham Wechayachai បានបដិសេធសំណើរបស់ប្រធានអាស៊ានក្នុងការដាក់ពង្រាយក្រុមអង្កេតការណ៍អន្តរជាតិបន្ថែមទៀត ដើម្បីតាមដានការអនុវត្តបទឈប់បាញ់ដែលប្រទេសថៃនិងកម្ពុជាសម្រេចបានដំបូងកាលពីថ្ងៃទី២៨ខែកក្កដា និង កិច្ចព្រមព្រៀង១៣ចំណុចនៃគណៈកម្មការព្រំដែនទូទៅ។

នាយករដ្ឋមន្ត្រីស្តីទីថៃ លោក Phumtham Wechayachai។ FB/Anwar Ibrahim

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចេញផ្សាយរបស់សារព័ត៌មានថៃ លោក Phumtham Wechayachai បាននិយាយកាលពីថ្ងៃពុធថា លោកបានច្រានចោលសំណើរបស់នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim) ដើម្បីបញ្ជូនអ្នកសង្កេតការណ៍អន្តរជាតិបន្ថែមទៀតដើម្បីតាមដានបទឈប់បាញ់នៅក្នុងប្រទេសថៃ។

ហេតុផលដែលនាយករដ្ឋមន្ត្រីថៃរូបនេះបញ្ជាក់ដល់សារព័ត៌មានថៃ គឺថា មានការងារជាច្រើនដែលក្រុមអ្នកសង្កេតការណ៍បណ្តោះអាសន្នអាស៊ាន (IOT) មិនអាចធ្វើតែម្នាក់ឯងបានទេ។

កន្លងមកភាគីកម្ពុជានិងថៃបានព្រមព្រៀងគ្នាទទួលយក ក្រុមអ្នកសង្កេតការណ៍បណ្តោះអាសន្នអាស៊ាន (IOT) ដើម្បីត្រួតពិនិត្យមើលការអនុវត្តបទឈប់បាញ់ ហើយ លោក អាន់វ៉ា អ៊ីប្រាហ៊ីម ក្នុងនាមជាប្រធានប្តូរវេនអាស៊ានក៏ធ្លាប់បានអះអាងពីការដាក់ពង្រាយផ្កាយរណបដើម្បីតាមដានការអនុវត្តបទឈប់បាញ់។

លើសពីនោះ ប្រធានអាស៊ាន ក៏បានបញ្ជូនក្រុមអ្នកសង្កេតការណ៍បណ្តោះអាសន្នអាស៊ាន (IOT) មកកាន់តំបន់ព្រំដែនដែលមានការប្រឈមខ្លាំង ជាពិសេសតំបន់ដែលកងទ័ពថៃ បានរាយលួសឡាម និងការចល័តគ្រឿងចក្រធ្វើសកម្មភាពផ្ទុយពីកិច្ចព្រមព្រៀងបទឈប់បាញ់ដែលភាគីទាំងពីរបានព្រមព្រៀងគ្នា។

នៅតាមសារបង្ហោះតាមបណ្តាញសង្គមងហ្វេសប៊ុក លោក អាន់វ៉ា អ៊ីប្រាហ៊ីម បានលើកឡើងថា បន្ទាប់ពីនិយាយជាមួយនាយករដ្ឋមន្ត្រីកម្ពុជា ហ៊ុន ម៉ាណែត ខ្ញុំក៏បានពិភាក្សាជាមួយនាយករដ្ឋមន្ត្រីស្តីទីថៃ លោក Phumtham Wechayachai ដើម្បីពិភាក្សាអំពីស្ថានភាពបច្ចុប្បន្នទាក់ទងនឹងបទឈប់បាញ់កម្ពុជា-ថៃ។

នាយករដ្ឋមន្ត្រីម៉ាឡេស៊ី បានលើកឡើងថា៖«ក្នុងកិច្ចពិភាក្សានេះ យើងក៏បានសង្កត់ធ្ងន់បន្ថែមលើកិច្ចខិតខំប្រឹងប្រែងរបស់ក្រុមអ្នកសង្កេតការណ៍បណ្តោះអាសន្ន (IOT) ដែលបន្តតាមដានយ៉ាងដិតដល់នូវស្ថានភាពនៅតាមព្រំដែន បន្ថែមពីលើការពិនិត្យមើលគំនិតផ្តួចផ្តើមមួយចំនួនទៀតដែលអាចឆ្ពោះទៅរកការពង្រឹងប្រតិបត្តិការត្រួតពិនិត្យបទឈប់បាញ់។
លើសពីនេះ យើងទាំងពីរបានពិភាក្សាអំពីកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ (GBC) ដែលនឹងប្រជុំនៅខែក្រោយ»។

កន្លងមក បណ្តាប្រទេសមហាអំណាចមានចិននិងសហរដ្ឋអាមេរិកជាអ្នកអង្កេតការណ៍ផ្ទាល់លើដំណើរការចរចារវាងភាគីកម្ពុជានិងថៃ ហើយ សហរដ្ឋអាមេរិក បានកោតសរសើរចំពោះតូនាទីដ៏សំខាន់របស់ម៉ាឡេស៊ីក្នុងការសម្របសម្រួលជម្លោះរវាងកម្ពុជានិងថៃនេះ។

ការបដិសេធរបស់ប្រទេសថៃ គឺបង្ហាញយ៉ាងច្បាស់ថា រដ្ឋាភិបាលថៃកំពុងបង្ហាញពីភាពគ្មានឆន្ទៈក្នុងការបញ្ចប់ជម្លោះដោយសន្តិវិធី ស្របពេលដែលក្រុមយោធារបស់ប្រទេសនេះកំពុងធ្វើសកម្មភាពបង្កហេតុជាបន្តបន្ទាប់។ ទង្វើរបស់ថៃនឹងធ្វើឲ្យប៉ះពាល់ដល់គោលនយោបាយរបស់ប្រទេសថៃយ៉ាងធ្ងន់ធ្ងរនៅថ្ងៃអនាគត៕